Usaga considera una "tomadura de pelu" l'anunciu del Gobiernu asturianu del nuevu protocolu de tuberculina

UVIÉU, 18 d'Avientu (EUROPA PRESS)

Union d'Uniones de Llabradores y Ganaderos (Usaga) consideró esti vienres una "tomadura de pelu" l'anunciu realizáu esti fin de selmana pol Gobiernu asturianu pa ellaborar un protocolu más flexible pa los animales que reaccionen a la prueba de la tuberculina.

Según esplicó'l voceru d'Usaga, Manuel Suárez, la única intención del Gobiernu asturianu con esi anunciu nun foi otra que la de restar importancia a la movilización que protagonizaron los profesionales esti vienres frente a la Conseyería de Desarrollu Rural y Recursos Naturales.

"Lo único que pretendieron ye restar importancia a la concentración de güei, de los que vivimos d'esto y non de les sovneciones estatales, como delles organizaciones agraries", dixo Suárez.

En declaraciones grabaes por COPE Uviéu y recoyíes por Europa Press, Suárez dixo que la protesta respuende a los problemes que sufren los profesionales ante unes campañes de saniamientu que-yos tán llevando "a la ruina" porque hai munchos animales a los qu'inmovilicen sin causa xustificada. "Hasta un 94% de los animales que se sacrifiquen resulta que nun dan esa positividá", llamentó.

Na manifestación esixeron a l'Alministración que se detengan "les inmovilizaciones brutales" d'animales que tán sufriendo nel entornu rural. Hasta'l 18 de setiembre d'esti añu, según los datos aportaos, hubo 1.156 animales sacrificaos, munchos más qu'otros años.