Bilbotarrek hiria eta auzoak hobetzeko 614 ideia proposatu dituzte 2027ko aurrekontu parte hartzaileen programan

BILBO 11 (EUROPA PRESS)

Bilboko Udalak bilbotarren 580 eskaera jaso ditu guztira 2027. urteko aurrekontu parte hartzaileen programaren baitan, eta eskaerok 614 proposamen zehatz eman dituzte hiria eta auzoak hobetzeko, hau da, aurreko edizioan baino ia %25 gehiago, orduan 492 izan baitziren. Aurkeztutako proposamenak bilbao.eus web orrian kontsulta daitezke.

Bilboko Udalak jakinarazi duenez, proposamenak egin dituzten pertsonen eta elkarteen profilari dagokionez, %62,30 emakumeak izan dira, eta %76,55 banaka aurkeztu dira. 41 eta 65 urte arteko pertsonak izan dira parte hartzera gehien animatu direnak, jasotako proposamen guztien ia %63,20 adin tarte horretako herritarrek egin baitituzte; haien ondoren, 31 eta 40 urte artekoenak izan dira ugarienak (%22,44).

Edukiari begiratuta, obrei buruzkoak dira ugarienak (%27,20), eta ondoren, osasuna eta kontsumoarekin (%22,48), zerbitzuekin (%16,61) eta mugikortasunarekin (%14,82) lotura dutenak.

Barrutiei dagokienez, Begoñako barrutiari lotutako ideiak izan dira nagusi (%20,52), eta atzetik izan dituzte Ibaiondo (%12,38), Deustu (%9,93) eta Errekalderi (% 9,45) buruzkoak. Hala eta guztiz ere, proposamen gehienak hiri osoari buruzkoak izan dira: %34,69.

Era berean, Bilboko Udalak Umeen Kontseiluaren parte hartzea nabarmendu du, 23 proposamen aurkeztu baititu: bederatzi zerbitzuei lotuta, sei mugikortasunaren alorrekoak, lau gazteria eta kirolari buruzkoak, eta beste lau obra publikoetakoak.

Orain, udal sailek teknikoki eta ekonomikoki bideragarriak diren ideiak lehenetsi eta hautatuko dituzte irailera arte, interes orokorreko, egokitasuneko eta udal estrategiako irizpideei jarraituz. Prozesu horretan aukeratuko dira herritarrek bozkatzeko fasera igaroko diren proiektuak. Antzeko edukia duten proposamenak proiektu bakar batean bilduko dira bozketarako.

HERRITARREN BOZKETA

Herritarrek irailaren 21etik urriaren 2ra bitartean bozkatuko dituzte, bilbao.eus webgunearen bidez, Bilborako onenak direla uste duten proiektuak. Bilbon erroldatutako 16 urtetik gorako pertsona orok parte hartu ahal izango du bozketan, eta bakoitzak boto bakarra izango du. Horretarako, inprimaki sinple bat prestatuko da, eta bertan identifikazio agiria eta jaiotze data erroldarekin baliozkotuko dira.

Baliozkotzeak egin ondoren, nahi adina proiektu hautatu ahal izango dira, baina ezin izango da gainditu partaidetza aurrekontuetarako ezarritako gehieneko zenbatekoa (bi milioi euro).

Bilboko parte hartze bidezko aurrekontua prozesu irekia da, bilbotarrei aukera ematen diena Udalaren urteko aurrekontuaren zati bat erabiltzeko ideiak eman eta proposamenak egiteko. 16 urte baino gehiago dituen eta Bilbon erroldatuta dagoen pertsona orok, Herritarren Partaidetzako Entitateen Udal Erregistroan inskribatuta dagoen entitate orok, legez eratuta dagoen edozein entitatek (elkarteak, fundazioak, sindikatuak, elkargo profesionalak eta zuzenbide publikoko korporazioak) eta ikastetxe orok parte har dezakete prozesuan.

Kasu guztietan, Udalaren sail edo programaren batekin zerikusia duten proposamenak aurkeztu ahal izan dira, hiri osorako edo barrutiren baterako interesgarriak direnak. Proposamenek, kontuan hartuak izateko, baldintza batzuk bete behar dituzte: udal eskumenekoak, legezkoak, interes orokorrekoak eta egingarriak izatea, 300.000 eurotik gorakoak ez izatea, eta 2027an gauzatu ahal izatea.