Gasteizko Udal Musika Bandak 'Somnium' kontzertua eskainiko du asteazken honetan

GASTEIZ 4 Feb. (EUROPA PRESS) -

Gasteizko Udal Musika Bandak 'Somnium' izenburuko kontzertua eskainiko du asteazken honetan, otsailaren 4an, Arabako hiriburuko Europa Jauregani, eta "txoko historikoak eta paisaia emozionalak zeharkatzen dituen errepertorioa" eskainiko du, Rodolfo Epelde bakarlaria eta Gasteizko Udal Txistulari Banda lagun dituela.

Sonia Diaz de Corcuera Gasteizko Udaleko Kultura zinegotziak, Iker Olazabal kontzertuaren zuzendariak eta Rodolfo Epeldek aurkeztu zuten emanaldia joan den astelehenean egindako prentsa agerraldian.

Iragarri zutenez, 'Cape Horn' (Otto M. Schwarz), 'The Seal Lullaby for Band' (Eric Whitacre), 'Via Claudia' (Johan de Meij), 'Zubieta' (Tomas Garbizu) eta 'Symphony No. VI The Blue Marble' (Julie Giroux) konposizioak entzun ahal izango dira 19:30ean hasiko den kontzertuan. Bandak lehen aldiz intrepretatuko ditu obra guztiak.

"Programak indar kontrajarriak jarriko ditu elkarrizketan, hala nola indarkeria eta samurtasuna edo historia eta etorkizuna, musika izan ginen horren ispilu zein izan gaitezkeenaren iparrorratz izan daitekeela gogorarazteko. Premisa erakargarriena da, eta ziur nago aurreikuspenak ere gaindituko dituela", esan zuen Diaz de Corcuerak aurkezpenean.

Bestalde, Olazabalek adierazi zuenez, "gure publikoa harritu eta hunkitzea gustatzen zaigu, eta horixe bera da, hain zuzen ere, kontzertu honen asmo bikoitza". Zehaztu zuenez, 'Cape Horn' obrak "hizkuntza distiratsu eta ia zinematografikoarekin inguratuko gaitu", eta 'The Seal Lullaby' lanak, aldiz, "hunkitu egingo gaitu bere sentiberatasun delikatuari esker".

Halaber, 'Via Claudia' konposizioak "bere instrumentazioaren aberastasunagatik eta koloreagatik liluratuko gaitu", eta Garbizuren 'Zubieta' lanak "harritu egingo gaitu estiloen arteko fusio egokiagatik". "Azken sinfoniak amaiera emango dio programari Julie Girouxen lengoaia pertsonal eta landua maisutasunez sintetizatuz", azaldu zuen Olazabalek.

EPELDE

Gasteizko Udal Musika Banda ez da bakarrik egongo kontzertuan, Rodolfo Epelde bakarlaria ondoan izango baitu. Epeldek berak aitortu zuenez, "proiektu honek ilusio handia egiten dit, etxera itzultzeko aukera ematen baitit, Gasteizko Udal Bandarekin lankidetzan aritzeko. Gainera, bandan lagun eta ikasle ohi asko ditut".

Kontzertuan bi instrumentu joko ditu musikariak, hain zuzen ere, tronpa 'Cape Horn' obran eta Alpeetako tronpa 'Via Claudia' eta 'Zubieta' konposizioetan.

"Alpeetako tronpa tresna ia ezezaguna da hemen, eta bere antzinako soinuak Gipuzkoako haran sakon eta berdeak gogora ekarriko dizkigu, Alpeetako bailaren antzeko landa tradizioari eusten baitiote. Johann de Meij konpositoreak 'Via Claudia' lanean sentsazio hori transmititzea lortzen du, eta Tomas Garbizuk Europa erdialdeko instrumentu horren aukerak 'Zubieta' konposizioaren erritmo eta instrumentu euskaldun tipikoetara egokitzea lortzen du", azaldu zuen.

Azken abesti hori Gasteizko Udal Txistulari Bandak ere joko du. Taldea ikasturte honetarako erronka berrian murgilduta dago: programazio propioa eta kolaborazioak areagotzea. Azken horrekin lotuta dago kontzertu hau, hain zuzen ere.