Izaskun Arrue Kulturguneak lehen urteurrena ospatuko du uztailaren 18an Gasteizen

GASTEIZ, 1 (EUROPA PRESS)

Izaskun Arrue Kulturguneak (IAK) lehen urteurrena ospatuko du uztailaren 18an Gasteizen, Yogurinha Borovaren eta Aurori Badiolaren 'Bingoz Bingo' ikuskizunarekin eta DJ saio batekin. Ekitaldia 20:00etan hasiko da.

Horrez gain, giroa berotzeko, urteurrenaren harira prestaturiko bertso saio bereziaren entsegu orokorra izango da uztailaren 16an, 19:30ean. Bi jarduerak doan izango dira, eta herritar guztiei irekiak, edukiera bete arte, IAK-ko arduradunek jakinarazi dutenez.

"Urte bizi eta zirraragarri honetan" 5.000 pertsonak baino gehiago igaro dira Izaskun Arrue Kulturgunean antolatutako "programazio askotariko eta kalitatezkoan", kontzertu, bakarrizketa, hitzaldi, tailer, ziklo, erakusketa eta mota askotako kultur jardueretan parte hartuz.

"Publikoaren erantzuna aparta izan da, eta horrek berresten du, hainbat urtetan aldarrikatu zen bezala, euskal kulturak horrelako espazio bat merezi eta behar zuela Gasteizen", ziurtatu dute.

Orain, ireki eta urtebetera, Lazarraga Kultur Elkarteak lortutakoa ospatu eta posible egin duten guztiei eskerrak eman nahi dizkie, eta "etorkizunera begira gogorarazi euskararen etxe honek oraindik ere guztion bultzada behar duela Gasteizen errotzen eta hazten jarraitzeko".