Lemoizko zentral zaharraren inguruko lurretan aparkaleku publikoa egitea aztertzen ari da Sprilur

BILBO, 14 (EUROPA PRESS)

Sprilur sozietate publikoak Lemoizko (Bizkaia) zentral nuklear zaharraren inguruko lursailetan aparkaleku bat egiteko aukerari berrekin dio, aurreko udal gobernuarekin hasitako lanketa berriro aktibatuz.

SPRI Taldeko sozietateak jakinarazi duenez, lehen zenbatespenen arabera, Armintzan aparkatzeko dagoen arazo larriari irtenbidea ematen lagunduko lioke 200 ibilgailura arte hartuko lituzkeen aparkalekuak.

Aparkalekua egitea bideragarria den edo ez erabakitzeko azterketak abiatzearekin batera, Sprilurrek ingurune osoan ingurumen azterketa bat egiteko konpromisoa hartu du, hasteko, inguruan nagusi diren espezie inbaditzaileak ezabatzeko, eta, aurrerago, zentral zaharraren ingurune osoko ingurumena lehengoratzeko plan bat gauzatzeko, Eusko Jaurlaritzako Ingurumen Sailburuordetzarekin elkarlanean.

Sprilur sozietate publikoaren eta Lemoizko Udalaren artean egindako akordioak eta hartutako konpromisoak daude proiektuaren oinarrian. Lemoizko Udalak zentral zaharreko dikea finkatzeko obren lizentzia emateko konpromisoa hartu du, baita etorkizunean bestelako enpresa jardueren ezarpena erraztekoa ere. Proiektuak aurrera egin dezan emango den hurrengo urratsa lurzoruaren jabetza Sprilurren eskuetara pasatzea da.