SANTIAGO DE COMPOSTELA 12 Jul. (EUROPA PRESS) -

O Ministerio de Industria e a Consellería de Innovación colaborarán na posta en marcha en Galicia do programa 'Cidades dixitais', promovido no marco do Plan Avanza para incorporar os concellos á Sociedade da Información.

O conselLo autorizou na súa reunión desta mañá a sinatura dunha adenda ao convenio de colaboración subscrito co departamento de Joan Clos para desenvolver o proxecto Avanza, na que se establece un investimento de 2,54 millóns ata 2008, dos que Industria achegará a metade e a Xunta e as administracións locais un 25 por cento cada unha.

Ademais, Innovación realizará unha convocatoria pública á que poderán acudir, en réxime de concorrencia competitiva, as cidades ou casas do concello e as propostas serán avaliadas por unha comisión paritaria formada polo Ministerio de Industria e a Xunta.

Os proxectos e actuacións financiables céntranse en varias liñas, como os servizos e aplicacións dE administración electrónica, entre as que figuran a implantación de ferramentas ou solucións tecnolóxicas para a modernización da xestión interna da administración local; os dixitais dirixidos a cidadáns e empresas do ámbito local mediante o uso das TIC e as actividades de formación e difusión.

As iniciativas subvencionables poderanse presentar ademais de xeito individual, de modo que o beneficiario sería unha única entidade, ou en cooperación, modalidade en que se considerarán preferentemente os proxectos que presente unha unión de entidades con experiencia en programas para impulsar o desenvolvemento e a implantación da Sociedade da Información.

BOLSAS

A maiores, a Consellería de Innovación procederá á convocatoria pública de 36 bolsas para a formación de dinamizadores da Sociedade da Información na comunidade, que se concederá para desenvolver estudios e prácticas formativas.

O obxectivo desta acción é proporcionar ás persoas seleccionadas a formación precisa para propiciar o achegamento dos cidadáns aos recursos que proporcionan as novas tecnoloxías. Así, con este propósito de formación achegaranse 327.600 euros.

Por último, o departamento de Fernando Blanco e a Sociedade Anónima de xestión do Centro de supercomputación de Galicia (Cesga) realizarán actividades de potenciación do software libre e para a instalación dunha sala de traballo corporativo móbil dotada con tecnoloxía 'access-grid'. Innovación achegará 80.000 euros para ampliar as actuacións recollidas nun convenio asinado en 2005 co Cesga.