A Coruña, 17 Nov. (EUROPA PRESS) -
A ministra de Educación e Ciencia, Mercedes Cabrera, visita hoxe o edificio 'Prisma de Cristal', futura sede do Museo Nacional de Ciencia e Tecnoloxía na Coruña, acompañada do presidente da Deputación, Salvador Fernández Moreda e do alcalde da cidade herculina, Javier Losada.
Cabrera, Fernández Moreda e Losada percorrerán a partir das 11.30 horas as distintas dependencias do edificio 'Prisma de Cristal', situado na zona de San Roque, e cedido pola Deputación da Coruña ao Ministerio de Educación como sede do Museo Nacional de Ciencia e Tecnoloxía.
Tras a visita descubrirase unha placa conmemorativa e as autoridades asinarán o convenio de cesión da sede, situada en Labañou.
A continuación, Cabrera acudirá, ao redor das 13.00 horas, ao Palacio Municipal de María Pita, para entregar, xunto a Losada, os Premios Prisma, creados polos Museos Científicos Coruñeses co obxectivo de estimular a produción de ferramentas de divulgación científica.
Finalmente, ao redor das 13.45 horas ambos se desprazarán á Casa do Home onde inaugurarán unha exposición baixo o título 'Museos para o futuro'.
