SANTIAGO DE COMPOSTELA 25 May. (EUROPA PRESS) -

A Consellería de Presidencia da Xunta anunciou hoxe que dedicará un presuposto de 686.000 euros a informatizar a totalidade dos Xulgados de Paz galegos en colaboración coa entidade Red.es --dependente do Ministerio de Industria-- o próximo outono, no marco do programa Rexistro Civil en Liña do Plan Avanza.

Así, Presidencia xestionará a conexión á rede corporativa e subministrará equipos de impresión aos xulgados de paz, tras a primeira reunión da Comisión de Seguimento do convenio asinado entre Xunta e Red.es en xaneiro deste ano.

Pola súa banda, Red.es subministrará e instalará un total de 375 ordenadores e proporcionará formación aos usuarios dos Rexistros Civís informatizados, en colaboración co Ministerio de Justicia.

Segundo sinalou a Xunta, este convenio impulsará novos servizos en liña "máis accesibles e eficientes" e permitirá "acelerar" a incorporación das tecnoloxías da información aos rexistros civís e xulgados de paz. En total, o desenvolvemento do Plan Avanza en Galicia requirirá a inversión de 1,3 millóns de euros.

Por último, apuntou que os xulgados de paz utilizarán a aplicación informática Inforeg creada para tal fin polo Ministerio de Justicia.