A campaña da Xunta 'Para gustos, cultura' achegará este verán unhas 3.400 actividades a 200 concellos galegos

   SANTIAGO DE COMPOSTELA, 19 Jun. (EUROPA PRESS) -

   A campaña 'Para gustos cultura', promovida pola Consellería de Cultura, Lingua e Xuventude, achegará este verán arredor de 3.400 actividades e espectáculos de 40 tipos diferentes a 200 concellos galegos, cunha énfase nos máis pequenos.

   Así o trasladou o titular de Cultura, José López Campos, na presentación da iniciativa, na que destacou a "transcendencia que ten apostar por unha cultura máis aló das barreiras, non só físicas e psíquicas, senón tamén territoriais", para así "poder achegar a cultura a todo o territorio galego".

   En concreto, realizaranse máis de 1.300 actividades de artes escénicas, produción audiovisual, circuítos de baile, maxia, música, circo e na rúa; máis de 1.800 accións de dinamización da cultura coa participación en festivais e mostras de distintos tipos, así como a programación nos museos, arquivos e bibliotecas, entre outros.

   Ademais, a axenda complétase con máis de 70 iniciativas relacionadas coa promoción da lingua; e con outras 140 actividades como mostras, concertos e experiencias inmersivas.

    "Todo o mundo ten os mesmos dereitos de acceder a cultura e temos que conseguir que calquera persona, en calquera sitio e en calquera situación, non só poida acceder aos marabillosos contidos culturais que temos en Galicia, senón que tamén ten dereito a crear cultura", subliñou o conselleiro.

   En relación a estas barreiras, López Campos lembrou o valor que ten aprobar a Lei de Cultura Inclusiva e Accesible de Galicia, "sen ningún voto en contra no Parlamento Gallego", o que "indica que hai unha sensibilidade importante de todas as formacións políticas".

"QUE NUNCA FALTE O APOIO Á CULTURA DE BASE"

   Pola súa banda, a presidenta da Federación Galega de Teatro Afeccionado (Fegatea), Chelo Pampillón, defendeu "que nunca falte o apoio á cultura de base" porque é "xeradora de público", e "trata de ofrecer sempre o mellor".

   En vistas ao 25 aniversario da entidade --que asinou este luns pasado un convenio coa Xunta cun orzamento de 55.000 mil euros para realizar as súas actividades-- , que se celebrará o próximo 6 de xullo, Pampillón salientou que o teatro amador "crece todos os anos" e isto é "todo un luxo".

   Tamén, o Mago Teto reivindicou a importancia destes espectáculos nas localidades máis pequenas e poder "tomar as prazas coa súa arte e maxia", con actividades creadas en galego, o que permiten "transmitir a importancia da lingua".

   O acto contou con tres espectáculos, dous deles --o de inauguración e peche-- a cargo da artista Marta Iglesias, da compañía 'Sempre Arriba' e outro intermedio polo Mago Teto.