Case 200 películas, 19 delas estreas, para a 33 edición de Cineuropa

SANTIAGO DE COMPOSTELA 31 Oct. (EUROPA PRESS) -

A edición número 33 de Cineuropa, a primeira baixo a dirección de Laura Seoane, programará entre os días 7 e 28 de novembro en Santiago de Compostela case 200 títulos, dos que 19 serán estreas en España, e premiará as traxectorias das actrices Emma Suárez e María Vázquez, así como da directora Rita Azevedo.

Así o recolle a programación completa de Cineuropa 2019, que se presentou este xoves en Santiago, nun acto no que se reiterou a vocación da cita de explorar a mirada feminina e o papel da muller no cinema, así como a diversidade de perspectivas.

A sección oficial estará composta por 103 películas, divididas en cinco categorías --Europea, Panorama Internacional, Docs Cineuropa, Latidoamericano e Animaeuropa, que se estrea este ano--, mentres que as restantes, até rozar as 200, dividiranse en seccións paralelas, que lembrarán traxectorias como as de Agns Varda, Chantal Akerman ou Jonas Mekas e analizarán cuestións de actualidade como o cambio climático ou o feminismo. Un total de 17 títulos serán galegos, entre os que se sitúan as estreas de cintas como 'Arima', 'Longa Noite' ou 'Eroski Paraíso'.

Como é tradición, este ano volverá celebrarse o clásico maratón de cinema, que será o 22 de novembro baixo o título 'O mundo contra min', centrándose na figura do antihéroe, con cintas como 'El crack' e 'El crack dos', de José Luís Garci, 'Jesus Shows you the way to the highway', de Miguel Llansó, 'Tank girl', de Rachel Talalay ou 'The man who killed Hitler and the bigfoot', de Krzykowski.

O festival abrirase o 7 de novembro no Teatro Principal cunha gala de inauguración na que se entregará o premio Cineuropa á actriz galega María Vázquez, tras o que se proxectará a película 'Ema', de Pablo Larraín, integrante da categoría Latidoamericano.

O día 16, no mesmo emprazamento, terá lugar a entrega do premio a Rita Azevedo, tras o que se estreará o seu último título, 'Danses macabres, squelettes et autres fantaisies', un documental no que traballa xunto a Pierre Léon e Jean-Louis Schefer.

A última xornada do festival será o momento para entregar o seu galardón a Emma Suárez, unha actriz da que, durante o festival, poderán verse as cintas 'El perro del hortelano', 'La propoera pell' e 'Vacas', que será a película escollida para pechar esta edición. Ademais, como novidade, o festival dedicará dúas xornadas finais a repor as películas premiadas.

ESTREAS E PRESENTACIÓNS

Cineuropa acollerá este ano un total de 19 estreas de películas a nivel estatal, así como nove preestreas de cintas que xa tiveron percorrido en festivais internacionais, pero que aínda non chegaron ás salas.

Entre as novidades, o público poderá ver 'Kuessipan', de Myriam Verrealut; 'L'adieu á la nuit', de André Techiné; ou 'Canción sen nome', de Melina León. Do mesmo xeito, haberá espazo para a exhibición de traballos como 'A filla dun ladrón', ópera prima de Belén Fumes, 'La ola verde (que sea ley)', de Juan Diego Solainas; ou 'Si me borrase el viento lo que yo canto', de David Trueba, que presentará en Compostela este traballo.

Ademais de Trueba, Cineuropa contará coa presenza de nove directores da sección oficial: Iratxe Fresneda, Eloy Enciso, Jaione Camborda, Emmanuelle Bonmariage, Sharipa Urazbayeva, Théo Court, Andrés Duque, Jorge Coira e Jesús Ron.

A sección de competición está marcada por películas caracterizadas por directores novos e noveis, a visión feminina e combativa e unha gran variedade formal e temática. Nela, haberá películas que non foron estreadas en Galicia ou no resto do Estado, como é o caso de 'Dragged across concrete', de S. Craig Zahler; ou 'Mektoub, my love: Canto I', de Abdellatif Kechiche.

Na sección oficial europea entrarán 35 títulos a competición, destacando nomes como o de Rodrigo Sorogoyen e o seu filme 'Madre'; 'Vitalina Varela', de Pedro Costa; os irmáns Dardenne, con 'Le jeune Ahmed', ou Sharipa Urazvayeva, con 'Mariam'; ademais da última película de Jessica Hausner, 'Little Joe', unha autora á que o festival dedica unha sección especial na programación paralela.

A área internacional suma outros nomes como 'Fourteen', de Dan Sallitt; 'Top End Wedding', de Wayne Blair; ou 'A girl missing', de Kodi Fukada; mentres que os documentais propoñen 20 títulos, entre os que se atopan 'Selfie', de Agostino Ferrente, 'Jawline', de Liza Mandelup, ou 'Delphine et Carole, insoumuses', de Callisto McNulty.

A sección Latidoamericano, pola súa banda, inclúe títulos como 'Monos', de Alejandro Landes, 'Familia sumergida', de María Alché, 'Blanco en blanco', de Theo Court, ou 'Ceniza negra', de Sofía Quirós. Finalmente, Cineuropa contará este ano cunha sección oficial exclusiva para cinema de animación, con cintas como 'Buñuel en el laberinto de las tortugas', de Salvador Simó.

MIRADA FEMININA E ECOLOXÍA

Os ciclos que compoñen a sección paralela do festival entran en conexión con temáticas específicas e de actualidade como o feminismo, as alertas sobre a situación climática ou as formas pouco habituais de mirar á realidade.

A análise da presenza feminina no cinema norteamericano realizará no ciclo 'Cinema e Feminismo: Bechdel en Hollywood', que reflexiona sobre os criterios para medir a presenza feminina en grandes producións como 'Alien', 'Carrie', 'Lady Bird', 'The ghost and mrs. Muir' ou 'Riddles of the Sphinx'.

Do mesmo xeito, Cineuropa homenaxea este ano a dúas directoras xa falecidas, Angs Varda e Chantal Akerman, coa proxección das súas últimas dúas películas, precedidas dunha charla sobre as súas figuras. Tamén haberá un espazo nesta programación paralela para a crítica Pauline Kael a través dunha selección das súas cintas favoritas.

Unha mesa redonda e a proxección de 'In between' e 'Walden: diaries, notes and sketches' en proxector, en versión orixinal e sen subtítulos, servirán para homenaxear ao director de cinema lituano Jonas Mekas, falecido este ano.

A maiores, Cineuropa contará tamén cun ciclo sobre Cinema e Cambio Climático 'Os últimos días no edén', no que se enmarcan títulos como 'Voyage of estafe: life's journey', de Malick, 'Planeta Azul', de Franco Piavoli, ou 'A princesa Mononoke', de Hayao Miyazaki.

Finalmente, o ciclo 'Paisaxes Urbanas do Cinema Galego' centrarase nas películas participadas por Galicia, incluíndo títulos como '18 comidas', 'A estación violenta', 'Adolescentes'. 'Las altas presiones' ou 'La estrella errante'.

As entradas e abonos para poder asistir a esta nova edición de Cineuropa poderán adquirirse desde o vindeiro luns, 4 de novembro, a través do portal compostelacultura.gal ou no despacho de billetes do Teatro Principal.