O PPdeG defende o "comportamento exemplar" de Villares "nas súas responsabilidades públicas"

   SANTIAGO DE COMPOSTELA, 6 Jun. (EUROPA PRESS) -

   O portavoz do Grupo Parlamentario Popular, Alberto Pazos Couñago, defendeu o "comportamento exemplar" do exconselleiro do Mar Alfonso Villares "nas súas responsabilidades públicas" e afirmou que tivo coñecemento da investigación por unha presunta agresión sexual o pasado mércores, cando se fixo pública a dimisión.

   "Non tiña referencia anterior nin creo que tivese por que tela", aseverou este venres en rolda de prensa a preguntas dos medios o portavoz popular.

   Ademais, cuestionado sobre se foi adecuada a despedida deste venres a Villares na toma de posesión da nova conselleira, onde foi arroupado polo Executivo autonómico co presidente Rueda á cabeza, Pazos Couñago insistiu en que "no que fai referencia á despedida de Villares das súas responsabilidades" foi "exemplar". "Caben poucas dúbidas disto", reiterou para, a continuación, sinalar que non coñece a ningunha organización política que "esixa esa toma de responsabilidades nun momento tan cedo".

   Para o portavoz popular, o exconselleiro tomou a decisión de renunciar "ao seu cargo, ao aforamento e á súa militancia" desde o "primeiro momento en que se abriu unha dilixencia de carácter xudicial".

   "Se outros políticos tomasen esa decisión nos mesmos tempos que o fixo Villares, o clima político en España sería moito máis respirable para todos. Lamento o que veño escoitando nos últimos días, pondo o foco nunha persona que no ámbito das súas responsabilidades públicas tivo un comportamento exemplar", manifestou.

"DOBRE VARA DE MEDIR"

   Nesta liña, preguntado sobre se ese modo de arroupar ao conselleiro podería lanzar unha mal mensaxe a vítimas de violencia de xénero, o parlamentario do PPdeG dixo que lle "sorprende" que se poña o foco "sobre unha persoa que no minuto un en que se abriu unha dilixencia xudicial renunciou ao seu cargo, ao seu aforamento e á súa militancia".

   "E resulta que esta é a persoa que ten que dar explicacións e á que se lle esixen as explicacións por parte de partidos que levan meses calados ante a vaga de corrupción que asolaga ao Goberno de España. Hai unha dobre vara de medir lamentable", apuntou tras mencionar os casos de "a imputada señora Gómez", "o imputado David Sánchez", "o imputado señor Gallardo" ou "o imputado fiscal xeral do Estado".

    Así, volveu a defender que desde o Goberno galego e as filas populares hai "un agradecemento expreso" á actuación de Villares respecto das súas "responsabilidades públicas". E iso, afirmou, "non menoscaba en ningún grao o respecto" ás actuacións xudiciais, así como a "os dereitos da denunciante e da súa familia" e "os dereitos do denunciado, incluída a presunción de inocencia e a súa familia".

   "Pediría a todo o mundo que se movese exactamente no ámbito de respecto escrupuloso da legalidade que está a facer o Goberno galego, o Grupo Parlamentario Popular e todo o Partido Popular", resolveu.

COMPARECENCIA RUEDA

   Doutra banda, a preguntas dos medios sobre a petición de BNG de convocar unha xunta de portavoces urxente para cambiar a orde do día do próximo Pleno e incluír a comparecencia de Alfonso Rueda, Pazos Couñago explicou que o valorarán "cando se produza" a xunta de portavoces.

   En todo caso, mostrouse sorprendido porque, insistiu, trátase "dunhas circunstancias que afectan o ámbito estritamente persoal dun exconselleiro", polo que dixo descoñecer "cal é o interese que ten que dar o presidente da Xunta" que, engadiu, "deu sobradas explicacións do coñecemento que ten deste asunto". "Sen que ninguén lle fixese unha pregunta, de 'motu propio', explicando o coñecemento exacto que ten do que fai referencia dunha cuestión que afecta á esfera privada do señor Villares", reiterou.