O PSdeG apoia buscar vías para aprazar as eleccións galegas e chama ao consenso

SANTIAGO DE COMPOSTELA 13 Mar. (EUROPA PRESS) -

O secretario xeral do PSdeG e candidato á Presidencia da Xunta, Gonzalo Caballero, apoia buscar vías legais que permitan o adiamento das eleccións autonómicas dadas as recomendacións sanitarias e considerou necesario "acadar xa" un consenso sobre a nova data.

Nun comunicado remitido aos medios este venres, Gonzalo Caballero reiterou que o adiamento debe contar con "todas as garantías no ámbito legal" e debe facerse "con consenso de todos os partidos". Ademais, subliña que o acordo debe levar aparellada unha nova data para as eleccións.

Así mesmo, o líder dos socialistas galegos pediu á Xunta que instaure un comité de seguimento que inclúa a todas as forzas para "ter información actualizada sobre a propagación do coronavirus e as medidas a tomar, tanto no ámbito sanitario como no que respecta á mobilidade, á economía e ás condicións de traballo en Galicia.

"A prioridade ten que ser a saúde dos galegos e das galegas", defendeu Gonzalo Caballero, que considerou necesario que todas as forzas políticas teñan capacidade para "coñecer de primeira man" as medidas que o Goberno galego impulsará para reforzar o Sergas e para colaborar cos sectores e coas empresas afectadas.

Precisamente, tamén este luns, a portavoz nacional do BNG e candidata á Xunta, tamén pediu o adiamento electoral con "consenso" e cunha data nova "antes de verán".

Ademais, na xornada do xoves, as principais forzas políticas galegas anunciaron a suspensión da campaña electoral con motivo da crise sanitaria que se vive en España polo coronavirus.