A Xunta publica unha guía para facilitar a posta en marcha de centros de servizos sociais en Galicia

SANTIAGO DE COMPOSTELA 27 Mar. (EUROPA PRESS) -

A Xunta de Galicia publicou unha guía para facilitar a posta en marcha de centros de servizos sociais en Galicia, que se pode consultar na páxina web da Oficina Galicia Empresa do Goberno galego.

O documento, redactado por técnicos da Consellería de Política Social, consta de 60 páxinas e recolle toda a información necesaria para crear novos equipamentos destinados a prestar dunha forma estable e continuada servizos, programas e actividades de servizos sociais nas distintas áreas, segundo informa Política Social nun comunicado.

Destacan que a publicación inclúe aspectos "crave" que van desde os trámites necesarios para a posta en marcha dun centro de servizos sociais, até as obrigacións e requisitos das entidades e dos centros de servizos sociais, así como información sobre a solicitude que hai que presentar para que o proxecto poida ser declarado iniciativa empresarial prioritaria (IEP).

Tamén a súa inscrición no Rexistro único de entidades prestadoras de servizos sociais (RUEPSS) e as autorizacións correspondentes, a tramitación municipal esixida, a formación do persoal, e outros procedementos relacionados coas actividades dos centros de servizos sociais.

A través desta guía buscan "facilitar a reactivación da actividade económica após a crise xerada polas consecuencias da pandemia da Covid-19" mediante unha simplificación administrativa que "favoreza a implantación e o funcionamento das iniciativas empresariais en Galicia".

Informan ademais que as distintas áreas de actuación no ámbito dos servizos sociais determinan a tipoloxía dos centros, programas e servizos, que se engloban nos seguintes apartados: centros para persoas maiores, centros para persoas con discapacidade, centros de atención á infancia, centros de menores, centros destinados ás familias, centros destinados a vítimas de violencia de xénero, centros de inclusión e programas.