UVIÉU, 14 Sep. (EUROPA PRESS) -
El sábadu 14 d'ochobre próximu, a les 16:00 hores en Santuyano (Bimenes), va celebrase la I Carrera pola Oficialidá, que yá tien les incripciones abiertes y cola que la Xunta pola Defensa de la Llingua quier reivindicar la oficialidá del asturianu.
Según señala la Xunta al traviés d'un comunicáu, trátase d'una prueba deportiva entamada col Conceyu de Bimenes, primeru d'Asturies que declaró la oficialidá nel so territoriu.
La carrera va tener dos pruebes: una carrera llarga de 16 quilómetros con caracter competitivu y que va dar una vuelta peles trés parroquies del conceyu. Esta carrera tien un preciu d'inscripción de 3 euros.
Per otru llau, la carrera curtia ye de 3 quilómetros, non competitiva y abierta a tolos públicos. Esta carrera tien un preciu d'inscripción de 6 euros.
Los dos percorríos van tener salida y meta en Santuyano y el preciu inclúi derechu a participar na carrera, dorsal con chip, seguru, camiseta conmemorativa, avituallamientos y bolsa del corredor o corredora que la organización consiga de los patrocinadores.
Otra manera, va haber una entrega de trofeos (19:00 hores) pa los trés primeros clasificados, homes y muyeres, del percorríu de 16 quilómetros, mentes que pa la carrera de 3 quilómetros va haber troféu pal meyor home y muyer de la prueba.
Les inscripciones yá se pueden facer online na páxina web: www.cronocheck.es. El plazu p'apuntase a la carrera ta abiertu hasta'l 10 d'ochobre a les 24:00 hores.
