Abogacía del Estáu reconoz el derechu a usar gallegu na capitanía marítima de Burela tres exixilo trés emplegaos

Piden "el cese darréu" del capitán marítimu tres sufrir acosu llaboral por pidir que s'aplique la llexislación del idioma

SANTIAGO, 03 de Xunetu (EUROPA PRESS)

Un informe de l'Abogacía del Estáu reconoz el deber de la utilización de "les dos llingües cooficiales --gallegu y castellán--", na redaición d'impresos, señalización y cartelería de la capitanía marítima de Burela (Lugo), tres exixilo trés trabayadores de la mesma, que denunciaben "incumplimientos y irregularidaes" na aplicación de la llexislación llingüística.

En rueda prensa, ún de los trabayadores, Brais Fernández Prieto,consideró que les conclusiones del documentu emitíu pola Abogacía del Estáu "da-yos la razón" de cara a la denuncia que presentaron por "nun poder utilizar el gallegu nel trabayu", como reconoz la llexislación "que ta en vixencia". De la mesma manera, pidió "el cese darréu" del capitán marítimu de Burela, Rafael Casanueva, por provocar una situación de "acosu llaboral" de magar les sos exixencies.

"Facemos públicu esti informe, porque queremos reestablecer la dignidá que mos robaron, y porque queremos dexar claro que la nuesa actitú siempre foi respetuosa cola llei y colos derechos de les persones, hasta con aquelles que dixeron que tratábemos d'imponer l'usu del gallegu", esclaró Fernández.

Tres presentar una denuncia'l 25 de payares a la Sodelegación del Gobiernu de Lugo y a la Oficina de Linguas Oficiáis, na que reclamaben el cumplimientu de la llexislación del gallegu na Alministración Xeneral del Estáu, los trés trabayadores aseguraron que Casanueva "tomó represalies al cambialos de puestu de trabayu sin marcar unes pautes concretes", y qu'hasta sufrieron "faltes de respetu y escesu de carga de trabayu" que los obligó a pidir la baxa llaboral --dos d'ellos siguen de baxa--.

Amás, Fernández criticó que'l testu de l'Abogacía del Estáu, fecháu a 18 de febreru del 2009, siguió "tapecíu demientres trés meses y mediu, dempués de que-y lu entregaren al director xeneral de Marina Mercante", hasta'l 1 de xunetu. "Esti informe diz que tenemos la razón en toles irregularidaes que denunciamos hai yá siete meses", destacó.