Aviso: Esta noticia tiene más de un año. Última actualización: 12/03/2010 17:04
El presidente del Principáu d'Asturies, Vicente Álvarez Areces, tachó los comentarios sobre la subida del IVA de la presidenta de la Comunidá de Madrid, Esperanza Aguirre, de "poco serios" y de tar espresaos en "tonu demagóxicu", amás d'asegurar que "nun ye aplicable" por llei que se puea renunciar al 100% de los ingresos adicionales derivaos del aumentu del tributu.
"Hai que ser serios na vida, sobremanera cuando fuimos escoyíos pa gobernar", declaró Álvarez Areces nel marcu de la Mesa Estraordinaria del Comité de les Rexones celebrada en Valladolid.
En declaraciones recoyíes per Europa Press, el presidente asturianu calcó en que la llei "obliga a tol mundu gúste-y o non" y criticó qu'al empar qu'Aguirre esixe l'amenorgamientu del IVA pida al Gobiernu "miles de millones pa que financie los sos servicios públicos". "Hai que tener rigor pa creer asemeyaes postures", repostió.
Coles mesmes, recordó que'l modelu de financiación autonómicu robláronlu toles comunidaes autónomes y indicó la necesidá de la recaudación pa que les rexones "funcionen".
"Ye obvio que nun va haber recursos si se recauda menos, qu'a lo meyor ye lo qu'indirectamente se busca pa derivar asina too a lo privao", aseveró Álvarez Areces, de la que señaló que los servicios públicos esenciales son la "garantía de seguridá" pa les families, especialmente nun "contestu de crisis".