Artistes piden la retirada de les tropes n'Afganistán

MADRID, 11 de Marzu (EUROPA PRESS)

Personalidaes del mundu de la cultura firmaron güei un manifiestu redactáu pola Plataforma contra la guerra d'Afganistán que pide la retirada de les tropes españoles esplegaes nel país asiáticu. Coles mesmes, apoyen la concentración que va tener llugar el próximu 13 de marzu en Madrid, y les que se van producir siete díes dempués, el sábadu 20, n'otres ciudaes españoles.

Ente los firmantes destaquen Rosa Regás, El Gran Wyoming, Alberto San Xuan, Almudena Grandes, Bebe, Pilar Bardem, Miguel Ríos, Carmen París, Juan Diego Botto, Willy Toledo, Cristina Rota, Eduardo Mendicutti, José Luis Sampedro, José Sacristán, Juan Diego, Luis García Montero, Luis Pastor, Mónica Cruz y Natalia Dicenta.

Tamién hai cares conocíes del ámbitu políticu, tradicionales nesti tipu d'iniciatives, tales como los dirixentes d'IU Cayo Lara, Gaspar Llamazares, Willy Meyer, Enrique Santiago y Inés Sabanés, el senador de EUiA Joan Josep Nuet, el coordinador xeneral d'EUiA, Jordi Miralles; el secretariu xeneral del PCE, José Luis Centella; y Santiago Carrillo.

Nel manifiestu, los firmantes aseguren que ven con "preocupación cómo la guerra d'Afganistán se vuelve cada vez más sangrina", y denuncien que "algunos intenten presentar la ocupación liderada por Estaos Uníos como una misión de paz y reconstrucción", cuando "la murnia realidá ye otra", y recuerden que l'añu pasáu morrieron más civiles afganos que "en nengún añu dende l'entamu de la ocupación nel 2001".

"De reconstrucción hai poco. La enorme mayoría de los recursos destínense a fines militares, y hasta de lo poco dedicao a la reconstrucción, una parte importante acaba en manes de multinacionales o de corruptos dirixentes llocales, impuestos pola ocupación. Esisten graves llendes a la democracia n'Afganistán, como nun podía ser d'otra manera nun país ocupáu. Les recientes elecciones reconciéronse universalmente como fraudulentas, pero Karzai sigue como presidente", argumenta.

Denuncien amás que la situación de les muyeres afganes ye "casi tan terrible como son los talibanes" y que "Karzai hasta aprobó una llei pente medies de la cual los homes puen violar a les sos esposes, teniendo algunes d'elles menos de diez años".

"Asina ye Afganistán tres más d'ocho años d'ocupación. Nun se pue xustificar l'arramamientu de sangre inocente que la población civil afgana ta pagando por culpa de la presencia militar estranxera. Y esti sufrimientu estiéndese a les families de los soldaos ocupantes, que ven cómo los suyos caen nuna guerra d'oxetivos escuros", plantega'l testu.

Los firmantes espresen la so solidaridá col pueblu afganu y el so deséu de que se-yos dexe llevantar el so propiu país, sin la "ocupación y sin los señores de la guerra y narcotraficantes qu'ésta trai". Por eso, piden al Gobiernu que "anule l'unvíu de tropes y que retire darréu los efectivos que nesti momentu participen nesa guerra".

"El millón d'euros al día que'l Gobiernu español gasta na ocupación tien de dir a fines sociales. Nesti sen, espresamos el nuesu apoyu a la Campaña pola retirada de les tropes españoles d'Afganistán, y a les movilizaciones contra la guerra qu'ésta convoca pal 20 de marzu de 2010", acaba.

CONCENTRACIONES

Dientro d'esta campaña de la 'Plataforma contra la guerra d'Afganistán', cobren especial fuerza les concentraciones de refuga. La primer d'elles va tener llugar en Madrid esti próximu sábadu día 13 ante'l Ministeriu d'Asuntos Esteriores -plaza de les Provincies, a partir de les 19 hores-. El restu celebrarán el sábadu 20 -la de Madrid ye'l 13 pa evitar convocar nuna ponte festiva-.

Na rueda de prensa de presentación de la concentración madrilana, la dirixente del PCE Felicites Velázquez aseguró que la d'Afganistán ye una "guerra coles mesmes connotaciones que la d'Iraq", polo que manifestó la intención de llevantar agora'l movimientu ciudadanu que nel 2003 espresóse contra la guerra d'Iraq. "Apostamos por que'l movimientu agora seya tan grande como foi'l contrariu a la guerra d'Iraq, puesto que nun hai nenguna diferencia", sorrayó.

Pela so parte, el dirixente d'IU, Jaime Alta denunció la "hipocresía" del Gobiernu del PSOE, que retiró les tropes d'Iraq hai seis años, pero fízolo pola fuerza de les movilizaciones, que lu obligaron a asumir el compromisu". "Pero sicasí la so participación n'Afganistán demuestra que ta baxo l'imperialismu d'Estaos Uníos y qu'apoya les sos intervenciones pa llograr los recursos enerxéticos y estratéxicos que supón la intervención d'Afganistán", esplicó.

Mayte Quintanilla, del Partíu Humanista, afirmó que "la muerte y miseria del pueblu afganu sigue, la so situación empeoró baxo'l poder de Karzai, empeoró la situación de les muyeres afganes, la ocupación ye para espoliar impunemente los recursos naturales y sirve al negociu indecente de multinacionales, banca internacional". Por eso sentenció que "esta guerra ye un negociu indecente y los soldaos españoles son combatientes invasores nun territoriu ocupáu".