Aurelio Martín inaugura les cabañes d'Humartini y Belbín en Picos d'Europa que busquen "favorecer el pastoríu"

UVIÉU, 03 de Xunetu (EUROPA PRESS)

El conseyeru de Mediu Rural y Pesca, Aurelio Martín, inauguró güei dos cabañes pilotu nes mayaes d'Humartini y Belbín, pa la conservación del pastoríu nos Picos d'Europa y la ellaboración del quesu de Gamonéu nel puertu. Nel actu, el conseyeru tuvo acompañáu pol alcalde de Cangues d'Onís, Alfredo García, y pol director del Parque de Picos d'Europa Rodrigo Suárez Robledano. El conseyeru y el restu d'autoridaes visitaron les cabañes y les queseríes de les mayaes, y charraron col pastor y la quesera que nesti momentu ocupen la mayada.

La iniciativa, promovida pol Consorciu Rural pal Desarrollu de la Mancomunidá del Oriente, tien sobre too un fin demostrativu pol so carácter pilotu, sobre lo que pue y debe facese nes diferentes mayaes del espaciu protexíu que constitúi Picos d'Europa "pa desarrollar y modernizar l'actividá agroalimentaria y el pastoríu nesta zona", señaló'l conseyeru.

Según informó'l Gobiernu rexonal al traviés d'un comunicáu, esti proyeutu supunxo una inversión cercana al mediu millón d'euros y cuenten con fondos del programa européu Leader Plus.

Martín afirmó que se trata amás de l'aición "más simbólica" de les conteníes nel Programa Pastores XXI. El resultáu del trabayu de recuperación, a cargu del arquitectu Arturo Guitérrez de Teherán, "ye un espaciu que cumple toles exixencies pa la producción de quesu y permite catar con comodidá, garantizando la so hixene y ofreciendo amás unos mínimos p'afayase", indicó Martín.

A lo último, el conseyeru señaló qu'esta iniciativa "va contribuyir, sin duda, a reforzar los niveles d'escelencia del quesu gamonéu y de la calidá de vida de los sos productores".