Bimenes entama güei los actos centrales de la so XIII Fiesta de la Oficialidá colos monólogos de Carlos Alba

UVIÉU, 03 de Xunetu (EUROPA PRESS)

El Conceyu de Bimenes entama güei los actos centrales del programa de la so XIII Fiesta de la Oficialidá de la Llingua Asturiana, cola actuación del monologuista Carlos Alba, de magar les 20.30 hores na Casa la Cultura, dempués de la entrega de los premios del XII Concursu pola Oficialidá del Asturianu.

Al día siguiente, tendrá llugar la xornada grande del cartel de celebraciones, cola llectura na casona de Los Careaga del pregón, per parte del escritor, filósofu y antropólogu Roberto González Quevedo, secretariu de l'Academia de la Llingua Asturiana. Al acabar la so intervención, dará entamu la misa n'asturianu, oficiada por José Manuel García de Jesús y cantada por El Corriellu la Pandorga.

De nueche, de magar les 23.00 hores, van actuar los grupos de música folk Los Ciquitrinos y Los Gatos del Fornu, y el DJ-J15. El conciertu, como'l restu d'actividaes d'esta xornada, va tener llugar nel prau de la fiesta, onde tamién va haber demientres tol día, xinta popular, talleres de manualidaes y puya del ramu, amás de l'actuación de los grupos folclóricos Los Yerbatos (Bimenes), Oter de Fumos (Valladolid) y Os Pauliteiros (Miranda del Douro).

Con estos actos ponse fin a una selmana d'actividaes qu'entamó'l pasáu vienres 26 de xunu y que conmemora los 13 años dende que l'Ayuntamientu declarare l'asturianu llingua oficial.