Blatter, "espantáu" polos berros racistes escontra Balotelli

GIAMPIERO SPOSITO / REUTERS

MADRID, 13 de Mayu (EUROPA PRESS)

El presidente de la FIFA, Joseph Blatter, condenó esti llunes los insultos racistes que dellos aficionaos de la Roma dirixeron al delanteru del AC Milan Mario Balotelli mientres el partíu qu'enfrentó'l domingu a los dos equipos, y aseguró sentise "espantáu" pola situación.

"Espantáu de lleer sobre l'abusu racista na Serie A la pasada nueche", escribió Blatter na rede social 'Twitter'. "Tratar esti problema ye complexu, pero tamos comprometíos en llevar a cabu l'acción, non solo con palabres", prosiguió.

El partíu, que se disputó en San Siro y acabó con empate a cero, paróse dos minutos al empiezu de la segunda metá dempués de qu'un sector de l'afición visitante dirixera cantaraes racistes y soníos de monu a Balotelli. La megafonía del estadiu alvirtió que los insultos teníen qie cesar y el xuegu volvió entamar pocu dempués.

Nun ye la primer vez que l'internacional italianu sufre esti tipu d'acciones. El pasáu mes de febreru, l'Inter de Milan, ex equipu del atacante, resultó sancionáu con dos multes de 15.000 y 50.000 euros por dedica-y cantaraes racistes, nos partíos ante'l mesmu Milan y el Chievo Verona. Mientres los choques pudo sentise la espresión 'nun hai negros italianos', en referencia a Balotelli, únicu xugador negru de la selección italiana.