Bloque por Asturies critica'l "despreciu" de Diana Navarro a la llingua pero agradez la so rectificación

UVIÉU, 08 de Marzu (EUROPA PRESS)

Bloque por Asturies llamentó güei, al traviés d'una nota prensa el "despreciu" de la cantante Diana Navarro a la llingua asturiana na gala d'entrega de los Premios de la Música, el pasáu día 4 en Madrid. Tres recoyer el grupu dixebra el galardón al meyor cantar n'asturianu, la presentadora fizo "chacia del nuestru idioma p'acabar disculpándose". Sicasí, el Bloque señaló que la cantante disculpóse na so páxina web, lo cual agradeció.

Bloque referíase asina al comentariu en broma que la cantante fizo tres la intervención de Xune Elipe, vocalista de Dixebra, qu'al recoyer el premiu fizo una reivindicació d'oficialidá n'asturianu. La cantante comentó, ente rises, "qué complicao yera too", y alvirtió en broma que si se ponía ella a falar n'adaluz nun se diba entender naide.

Tres felicitar a Dixebra pol premiu, el Bloque llamentó que "l'artista malagueña Diana Navarro se riere y ficiere chancia del nuestru idioma al entregar el premiu a Dixebra". "Esto namás demuestra la inorancia que fomenta'l sistema educativu español, que fala de pluriculturalidá y nun ye quién a esplicar a la so población los valores de la diversidá llingüística qu'esiste nel Estáu. Ye bien verdá qu'a esto ayuda muncho la situación d'indefensión que carez l'asturianu por nun ser oficial", comentó la nota prensa.

"P'acabar queremos reconocer a Diana Navarro que rectificar cuando una persona s'enquivoca ye d'agradecer y ella fízolo na so páxina web, onde se disculpó mandándose del castellán y del asturianu", acabó.