El Cártel del Golfo (México) soborna a periodistes pa que nun cubran los socesos violentos

Reuters

REYNOSA (MÉXICO), 12 de Marzu (Reuters/EP)

El cártel del Golfu soborna a periodistes con dineru, prostitutes y alcohol pa que nun cubran los socesos violentos que mientres les últimes trés selmanes tán rexistrándose nel nordés del país en ciudaes fronterices col estáu estadounidense de Texas, según denunciaron numberosos editores y periodistes d'estes zones.

Sicarios pertenecientes a esta organización criminal paguen 500 dólares al mes y sobornen con servicios de prostitutes y botelles de llicor a dellos periodistes pa qu'asusten y llogren callar a los sos compañeros d'oficiu ante la fola de violencia que dende hai trés selmanes sacude a la comarca de la ciudá industrial de Reynosa.

Estos socesos, sicasí, malpenes tuvieron cobertoria mediática, a pesar de que morrieron sobre 100 persones. Esta práctica, amás, quedó n'evidencia pola gran repercusión mediática que tuvieron fechos semeyantes n'otres zones del país.

En too México morrieron casi 19.000 persones a causa de la violencia vinculada al narcotráficu dende que'l presidente Felipe Calderón subió al poder nel 2006 y llanzó una campaña militar y policial contra los cárteles.

En munches ocasiones a lo llargo de los últimos años a los periodistes mexicanos obligáronlos n'ocasiones sicarios a aceptar dineru pa escribir favorablemente sobre los traficantes o nun cubrir muertes. La diferencia ye que nesta ocasión el cártel del Golfo paez ser a callar casi por completu la cobertoria mediática de la violencia na so zona d'influencia.

"Nes nueses redacciones infiltráronse esos reporteros, monitoreen lo qu'escribimos, saben ónde vivimos. Con esti sistema, los narcos tienen un control directu sobro nós", dixo l'editor d'un diariu llocal que pidió l'anonimatu pa protexer la so seguridá.

Munchos d'estos periodistes a sueldu nun lo escuenden y vése-yos llegar a ruedes de prensa en caros vehículos touterrenu, munches veces acompañaos d'homes armaos, frecuentemente pa evitar que s'espardan noticies sobre asesinatos.

Un reporteru nel pueblu fronterizu de Nuevo Progreso afirmó que'l so trabayu inclúi tomar dineru de policíes corruptos a sueldu del cártel del Golfo y distribuyilu a los reporteros. Per otru llau, munchos d'estos 'narco periodistes', una vez deteníos, nun pudieron xustificar los cientos de dólares qu'había nes sos carteres, pues la mayoría de los periodistes gana menos de 400 dólares al mes.

"EQUÍ NUN PASA NADA"

Los residentes de Reynosa y la so comarca recurrieron a redes sociales como Facebook, Twitter y Youtube, onde suben vídeos tomaos colos sos celulares y notifiquen actividaes sospechoses nun intentu por informar del brote de violencia.

"Ún de los derechos humanos fundamentales arrampuñóse nesta parte de Méxicu y el Gobiernu federal nun diz nada", dixo l'analista de seguridá independente Alberto Islas, en Ciudad de México.

Los ataques de los narcotraficantes ficieron de México ún de los países más peligrosos pa los medios, según el Comité para la Protección de Periodistes (CPJ, nes sos sigles n'inglés) un organismu independente con sede en Nueva York, qu'afirma que nel país azteca morrieron polo menos 24 periodistes dende'l 2006.

Pero algunos de los 'narco reporteros' podríen tar en mayor riesgu, pues polo menos cinco periodistes sospechosos de trabayar pa los cárteles desapaecieron hai dos selmanes en Reynosa.

"El mensaxe del cartel del Golfo ye: equí nun pasa nada. Los sicarios hasta recueyen los sos muertos dempués de los tiroteos pa que nun haya evidencia de lo que ta pasando", dixo un rexidor del pueblu de Río Bravo (norte de México), cerca de Reynosa.