'Cellero' lleva al Jovellanos la primer representación teatral del 'Lazarillo' n'asturianu

Ensayu de la representación.
EUROPA PRESS
Actualizado 17/10/2012 15:53:23 CET

UVIÉU, 17 d'Ochobre (EUROPA PRESS)

El monologuista Carlos Alba 'Cellero' llevará esti xueves al Teatru Jovellanos de Xixón la primer representación teatral n'asturianu de la obra 'La vida de Lazarillo de Tormes y de sus fortunas y adversidades', titulada 'Llázaro de Tormes' y presentada baxo'l formatu de monólogu unipersonal. La representación tendrá llugar a les 20.30.

En declaraciones a Europa Press, el propiu monologuista mostróse satisfechu col resultáu de la versión, traducida y ellaborada por él mesmu, pues la obra "suena mui bien en llingua asturiana". "Da la impresión que l'orixinal taba escritu n'asturianu", bromia, remarcando les semeyances ente esti idioma y el castellán antiguu nel que s'escribió'l llibru.

Llevaba dos años trabayando la idea de facer esta obra, aunque la ocurrencia foi muncho antes, dempués de ver la representación monolóxica que 'El Brujo' ficiera del mesmu 'Lazarillo'.

Sobre la traducción, señala que'l monólogu "ye un xéneru mui oral y popular", y que'l 'Lazarillo' "ye un personaxe del pueblu, un probe home que pasa mucha miseria y fame". "Ye una obra complexa, pero suena popular, nun ye pedante", señala del orixinal. El so trabayu contó cola revisión llingüística y lliteraria del profesor Miliu Rodríguez Cueto.

La representación dura una hora y vente minutos, y matiza qu'aunque "hubo que quitar coses ye mui fiel al orixinal", y representa "la miseria, la fame y lo mal que lo pasaba la xente nel sieglu XVI", motivu pol que considera qu'esta obra "ye actual".

La escenografía será una carreta coles coses del pregoneru, pues 'Cellero' quiso afondar nesta figura. Como curiosidá, señala que les munches referencies al vinu de la obra orixinal serán nesti casu menciones al vinu de Cangas.

Esta será la segunda representación teatral d'un clásicu de la lliteratura española n'asturianu, dempués de la que fizo'l grupu 'Nun tris' del Quijote de Cervantes, destinada a los neños. El 8 de payares Cellero llevará la obra al Teatru Prendes de Candás, nesti casu en castellán y pa los alumnos de Secundaria del Institutu, y el día 10, nel mesmu escenariu, n'asturianu y p'adultos.