La CEOE caltién que cuanto más baxen los xornales mayores van ser les posibilidaes de crear emplegu

EP

MADRID, 12 de Marzu (EUROPA PRESS)

El presidente de la Comisión d'Economía de la CEOE, José Luis Feito, afirma que "cuanto más caigan los xornales por persona ocupada y hora trabayada, mayores van ser les posibilidaes d'aumentar l'emplegu ya promover l'actividá productiva".

Asina lo caltién Feito nun artículu sobre 'La crisis, los costos salariales y el empleo' publicáu na revista de la Cámara de Comerciu de Madrid.

Feito aportuna en que ye necesaria una contraición de los xornales n'España pa fomentar la competitividá y acelerar la recuperación económica, pues, al so xuiciu, resulta "indispensable" que los costos salariales nominales por unidá de productu crezan menos que los de los competidores d'España.

A tal fin, propón que la subida salarial tea perbaxo de la de los países competidores o que la productividá española creza penriba de la d'ellos. Sicasí, precisa qu'a curtu plazu y tando en recesión, la única vía pa qu'aumente la productividá ye que caiga l'emplegu más de lo que cai'l PIB.

Nesti sen, esplica que l'emplegu baxa más o menos que'l PIB en función del aumentu o la contención de los costos salariales y señala que les subíes reales d'estos costos nel 2008 y el 2009 (con un 2,3% y un 4%, respectivamente, frente al 0,1% y el 1,1% de la media europea) "aceleró" la destrucción d'emplegu mientres la crisis.

Ésta, dixo, "ye la causa de que la perda d'emplegu n'España fuera trés veces superior a la media europea".

"Nuna crisis económica, cuantos más ríxidos a la baxa seyan los xornales reales, menores van ser les posibilidaes d'aumentu a mediu plazu d'estos xornales", alvierte.

MUNCHU PARU PRESIONA A LA BAXA LOS XORNALES.

Coles mesmes, apunta qu'una cifra de paru bien eleváu acaba por exercer, antes o dempués, una "poderosa presión a la baxa sobre los xornales reales", polo qu'entiende que, "o s'axusten a los baxa los xornales reales, o va intensificase la perda d'emplegu vinculada a la crisis".

Feito indica que los trabayadores en paru pierden productividá en proporción a lo que dura la so situación de desemplegu y, poro, namás puen recolocase cobrando xornales que reflexen esa menor productividá.

"Nun hai atayu pa xubir los xornales reales sin que seya pela vía del aumentu de la productividá de los trabayadores (...) Si estos xornales superen la productividá media de los trabayadores emplegaos, va reducise l'emplegu y los xornales reales", avisa.

El presidente de la Comisión d'Economía de la CEOE entiende "imprescindible" evitar la rixidez a la baxa de los xornales pa evitar que, si nel futuru asocede otra recesión económica, "la insensibilidá de los costos salariales al cambiu de ciclu vuelva intensificar la destrucción d'emplegu".