Creen la primer titulación dedicada al 'heavy metal'

MADRID, 14 Mayu (EUROPA PRESS)

Una universidá de la ciudá inglesa de Nottingham, ubicada nel centru del país, va impartir dende'l próximu mes de setiembre'l primer cursu d'educación superior en tol mundu dedicáu a la historia y composición de música 'heavy metal'.

"Creemos esti cursu pioneru en respuesta a la demanda de los estudiantes y al crecimientu musical de Nottingham", esplicaron los responsables del New College Nottingham, centru que va impartir la nueva titulación y ubicáu na ciudá onde surdió'l multitudinariu festival de rock Download, y na que tamién nació Bruce Dickinson, el carismáticu vocalista d'Iron Maiden, una de les bandes más representatives d'esti xéneru musical.

Precisamente foi nel Reinu Uníu onde surdieron les bandes pioneres del rock 'heavy' nos años 60 y 70, como Led Zeppelin, Deep Purple y, sobremanera, Black Sabbath, el grupu del excéntricu Ozzy Osbourne, autores d'unes lletres escures y un so 'soníu pesáu' de guitarra, vinculáu a l'actividá industrial de la so Birmingham natal, considerao la nacencia del metal'.

UN TEMARIU BIEN 'HEAVY'

La hIstoria d'estes bandes forma parte del temariu que van estudiar los futuros alumnos d'esta titulación. Tamién van aprender a componer y interpretar cantares de 'heavy metal', y como exame final tendrán que superar con éxitu una xira d'actuaciones per sales del Reinu Uníu.

El centru d'educación superior yá abrió la inscripción pa esta titulación pionera nel Reinu Uníu, que tien una duración de dos años. La matrícula por cursu supera los 6.000 euros, según la web del centru educativu. De siguío, los alumnos van poder recibir el títulu equivalente a una llicenciatura universitaria otorgáu pola Nottingham Trent University.

"EL HEAVY NUN SE TOMÓ EN SERIO"

"Pue estudiase música n'Oxford, Cambridge y en toles ciudaes de tol Reinu Uníu, pero equí en Nottingham queríamos ofrecer daqué especial que reflexe la cultura de la ciudá", esplicó'l profesor d'interpretación musical y director del cursu, Liam Maloy, en declaraciones a los medios británicos.

"Nel pasáu, el 'heavy metal' nun se tomó en serio y nun tien credibilidá académica en comparanza con otros xéneros como'l jazz y la música clásica. Pero eso ye namás una "construcción cultural", llamentó'l profesor en referencia a los prexucios qu'existen contra un xéneru musical estigmatizáu mientres años polos sectores sociales más conservadores.

Maloy aseguró que la titulación va realizase con "rigor académico" en respuesta a les crítiques d'asociaciones como la 'Campaign for Real Education' (Campaña pola Educación Real), presidida pol profesor Chris McGovern, que considera esti cursu "una perda de tiempu".

"Los músicos de rock que tuvieron éxitu nun precisaron nengún títulu pa llogralo", sentencia McGovern cuestionando la "utilidá" de la nueva titulación.