UVIÉU, 3 Nov. (EUROPA PRESS) -
L'asociación Iniciativa pol Asturianu solicita que'l mardatu-marcu de RTPA reconoza como una de les misiones de RTPA como serviciu públicu sía la de normalizar socialmente l'asturianu. "Y la única manera de normalizalu ye ufiertar conteníos de calidá en tolos xéneros y formatos, con corrección llingüística, adecuadamente promocionaos y n'horarios afayadizos pa esti fin", señalen.
Al traviés d'una nota de prensa, Iniciativa recuerda qu'hai un añu presentaron una propuesta pal mandatu-marcu de la RTPA col que buscaben "ufrir propuestes pa da-y utilidá social a la RTPA nos vinientes diez años, convirtiéndola nuna ferramienta eficaz na tresmisión del asturianu y na vertebración d'Asturies".
Asina, un añu depués vuelven señalar que la RTPA, "como serviciu públicu que ye", ha contribuir al procesu de normalización social del asturianu y gallego-asturianu, "garantizando l'accesu de la ciudadanía a conteníos na llingua propia en tolos xéneros y formatos, qu'han ser adecuadamente promocionaos y emitíos n'horarios afayadizos pa esti fin".
Una situación que según Iniciativa afalaría una industria audiovisual propia que garantice la producción d'estos conteníos "asumiendo un rol compensatoriu respectu a otres cadenes públiques o privaes". Amás, indiquen que RTPA tien que ser exemplar nel so compromisu colos elementos fundamentales y actuales de la cultura asturiana, "renunciando a siguir les dinámiques propies de los otros medios de comunicación con presencia n'Asturies".
"Esta ye la única forma qu'entendimos y entendemos dende Iniciativa pol Asturianu pa consiguir una radiotelevisión al altor de les circunstancies sociollingüístiques d'Asturies", afirmen, p'añadir que la televisión y la radio pública tienen que valir pa "recuperar l'autoestima de los asturianos y les asturianes al rodiu de la so llingua y cultura propies".
"Tenemos la oportunidá de camudar la situación de la RTPA al traviés d'esti nuevu Mandatu marcu, que va afitar la forma de trabayar la próxima década. Nun podemos dexar pasar esta oportunidá hestórica pal asturianu, p'Asturies y pal propiu Ente", apunten p'acabar.
