IU propondrá entamar el votu electrónico pa los asturianos residentes nel estranxeru

UVIÉU, 16 de Mayu (EUROPA PRESS)

Izquierda Unida d'Asturies va proponer la implantación del votu electrónico nel sistema electoral autonómicu, polo menos pa los asturianos residentes nel estranxeru. Va facelo nel marcu de la revisión de Llei Electoral que se punxo en marcha na Xunta Xeneral.

Asina lo anunció'l diputáu autonómicu Ángel González, nuna rueda de prensa na que compareció acompañáu del coordinador xeneral d'IU Asturies, Manuel González Orviz, y del senador d'IU por Asturies, Jesús Iglesias.

González defendiólo basándose en delles intervenciones realizaes polos espertos participantes na comisión d'estudiu de la posible reforma del sistema electoral autonómicu, favorables a una modernización del sistema.

El parlamentariu recordó que los medios informáticos son "factibles" d'incorporar y "baratos", y amás facilitaríen el desarrollu de votu antemanao pa les persones que viven nel estranxeru. Na so opinión tendría qu'empezar por esti colectivu "porque ye'l que más lo precisa". Sicasí, la so intención ye que'l votu electrónico s'estienda a tol sistema electoral.

DEROGACIÓN DE LA LLEI

Paralelamente a esta propuesta, Izquierda Unida va defender, al traviés d'una iniciativa nel Senáu, la derogación de la llei estatal qu'anuló'l derechu al votu del censu de residentes nel estranxeru nes elecciones municipales, y qu'enllantó'l sistema de "votu rogao" pa les autonómiques y les xenerales.

Según les estimaciones que recuerda la formación d'izquierdes, la participación electoral d'esti colectivu, tres la entrada en vixencia d'esta llei, en xineru del 2011, baxó del 30% al 5%.

Na propuesta, IU solicita l'anulación d'ambes midíes, pa garantizar el sufraxu dafechu a los emigraos, asina como l'estudiu del proyectu d'implantación del votu electrónico.