L'alcaldesa de Xixón reconoz que'l PSOE nun lleyó una declaración aprobada que fala de tortures a inmigrantes

XIXÓN, 11 de Marzu (EUROPA PRESS)

L'alcaldesa de Xixón, Paz Fernández Felgueroso, reconoció güei que la conceyala de Servicios Sociales, Esperanza Fernández Puerta, representante del PSOE nel Conseyu de Cooperación, dio'l vistu bonu ensin lleer el documentu antes a la Declaración Institucional propuesta por IU na que se defendía la postura del actor Willy Toledo y falábase de que n'España había inmigrantes escorríos y torturaos.

Felgueroso, mientres una visita a les instalaciones acondicionaes como albergue de pelegrinos nel camping de Deva, mostró la so disconformidá col conteníu lliteral de la Declaración. Coles mesmes, apuntó que'l Conseyu de Cooperación centróse nel alderique sobre la defensa de los Derechos Humanos en cualquier país onde se violen.

"El documentu ye manifiestamente meyorable", indicó la rexidora antes de puntualizar qu'hai unos párrafos concretos que se refieren a España que nun comparte de nenguna manera. L'alcaldesa eludió pronunciase sobre si consideraba que lo asocedío yera una falta de llealtá per parte d'IU-BA-LV, el so sociu nel Gobiernu.

TESTU

El conceyal de Cooperación Internacional, Jesús Montes Estrada, negó pela so parte que la declaración diga qu'España ye un país torturador, sinón que se constata, tal como reflexa un informe d'Amnistía Internacional del 2008, qu'en dellos llugares "prodúcense tortures, malos tratos y vexames".

"Eso nun lo inventó yo", indicó dempués de reconocer qu'él mesmu redactó'l documentu y que s'apoyó pa ello n'otres declaraciones yá escrites y a les que-y foi añadiendo elementos p'avalar la so postura.

En concreto, citó, según l'informe d'Amnistía, que se treslladare nun avión dende España a los sos países d'orixe a inmigrantes que resultaron deteníos dempués. Tamién señaló que nun ye casualidá que la Generalitat catalana encamentara que s'estremen les midíes pa evitar que se puean cometer tortures a los deteníos. Montes Estrada afaló al Gobiernu Nacional a que cada vez que se produza un fechu asina s'investigue'l casu y se "empapele" a los responsables.

Coles mesmes, criticó que se tea faciendo un esfuerzu "bien grande" dientro del ámbitu de la UE y de la xente más retrógrada de Xixón d'intentar asitiar a Cuba como "l'enemigu públicu númberu ún". "Hai situaciones un munches de partes del Mundu infinitamente más graves qu'en Cuba, pero como esti país nun ta nel sistema, preténdela demonizar sistemáticamente". Nesti sen, citó otros casos onde esiste vulneración de Derechos Humanos, como Colombia o Marruecos

Estrada señaló que nun cree que'l conteníu de la Declaración molestare al so sociu de Gobiernu nel Conceyu, sinón que más bien "contrarió". Sicasí, como indicó a l'alcaldesa anteriormente, recordó que se trata d'un Gobiernu de "conveniencia" y que "nun tienen porque tar d'acuerdu en too nin pensar lo mesmo siempre". Tamién esclaró a la rexidora que se basaba nos datos d'Amnistía Internacional.

Amás, puntualizó que nun se trata d'una Declaración Institucional sinón d'un documentu presentáu nel Conseyu de Cooperación y Solidaridá Internacional que la so definición final yera "qu'en tolos pueblos del Mundu respeten los Derechos Humanos", que, al so xuiciu, yera lo que realmente se votaba.

Montes Estrada animó a nun sigui-y el xuegu al que tien "obsesión" con Cuba y aludió a los viaxes de dellos dirixentes del PP al país caribeñu, como'l senador Manuel Fraga, l'ex presidente del Gobiernu José María Aznar o l'alcalde d'Uviéu; Gabino de Lorenzo, del que dixo que se pasó toa una nueche fumando puros col presidente cubanu, Fidel Castro. "Nun se pue ser tan cínicu nin tan hipócrita", repostió.

Tamién acusó a los grandes medios de comunicación de tapecer delles informaciones y esplicó en concreto qu'hai qu'acudir a Internet pa poder enterate de que'l 'númberu dos' de la guerrilla colombiana FARC, Raúl Reyes, muertu nun bombardéu, hai bien pocos años taba recibiendo l'abrazu del ex ministru y ex presidente de la Generalitat Valenciana, Eduardo Zaplana, en Valencia. Pa Montes Estrada, "IU, pese a ser la tercer fuerza del país, nun esfruta de la mesma llibertá d'espresión qu'otros partíos más grandes como puea ser el PSOE".