L'Axencia de Sanidá Ambiental y Consumu recibió nel 2009 casi 2.500 denuncies

El Principáu nun facilita'l númberu d'inspectores porque "los exércitos nun dicen cuálos son los sos efectivos"

UVIÉU, 12 de Marzu (EUROPA PRESS)

L'Axencia de Sanidá Ambiental y Consumu, integrada na Conseyería de Salú y Servicios Sanitarios del Principáu d'Asturies, recibió a lo llargo del añu 2009 un total de 2.470 denuncies de consumidores, de les que 1.292 treslladáronse a otros organismos competentes.

Los datos ufiertólos güei'l director de l'Axencia de Sanidá Ambiental y Consumu, Juan Llaneza Llaneza, nuna rueda de prensa ofrecida güei n'Uviéu. Sicasí, Llaneza evitó dar los datos de les sanciones que s'impunxeron, cuidao que, según señaló, esisten recursos y poro hai procedimientos que nun tán zarraos. En cualquier casu, dixo que la sanción nun persigue en nengún casu un interés recaudatoriu.

El director de l'Axencia tamién ofreció datos sobre los procedimientos d'arbitraxe, una vía extraxudicial, "eficaz y gratuita" que busca resolver los problemes que surdan ente consumidores y empresarios o profesionales, y que requier siempre de que les dos partes acepten sometese a la mesma voluntariamente.

Asina, l'Axencia tramitó nel 2009 un total de 1.029 solicitúes d'arbitraxe solicitaes por ciudadanos individuales (309), asociaciones de consumidares (37) y organismos públicos (683). Dieron llugar a 488 laudos, mientres que 177 acabaron con acuerdu previu. Un total de 1.310 empreses asturianes tán incorporaes al sistema arbitral. Pue reconocéseles por un anagrama naranxa que muestren.

La mayoría de les reclamaciones, igual que les denuncies tienen que ver coles telecomunicaciones, algo que Llaneza consideró lóxico dau'l nivel d'implantación de nueves tecnoloxíes.

L'Axencia de Sanidá Ambiental y Consumu intervino l'añu pasáu en 617 alertes qu'emiten tolos organismos encargaos de consumu, tanto nacionales como internacionales. La mayoría de les mesmes refiérense a xuguetes, prácticamente un 37% en tola UE. Asturies treslladó seis alertes nel 2009, sobre un total de 864 que partieron de les distintes comunidaes autónomes.

Les actuaciones d'inspectores l'añu pasáu dende Consumu fueron 1.047. Esti tipu d'actuaciones realícense por denuncies encontaes, por campañes, por alertes, o pa realizar una planificación determinada.

Llaneza nun quixo facilitar el númberu d'inspectores de Consumu que trabayen nel Principáu repitiendo que "los exércitos nun dicen cuálos son los sos efectivos". Apuntó que nun son munchos y que, en tou casu, menos de los qu'a él-y prestaba tener.

SIMULADOR

A lo último, Llaneza anunció que'l llunes va ponese en marcha una nueva acción formativa, consistente nun simulador de compra, llamáu 'Compra Segura per Internet', que reproduz un portal de comerciu electrónicu coles mires de simular procesos de compra y les incidencies más habituales que se puen presentar nesti tipu d'operaciones.

Daránse a conocer los derechos y los deberes de les persones consumidores y les víes de reclamación en casu de compres non satisfactories. Pondráse en marcha en tolos Centros de Formación pal Consumu de forma simultánea.