El Leader de la Montaña Central apoyará un proyectu pa recuperar el robecu na Sierra l'Aramo

UVIÉU, 12 de Marzu (EUROPA PRESS)

El Grupu d'Acción Local de la Montaña Central d'Asturies aprobó güei les primeres ayudes del programa Leader, unes sovenciones que suben a 736.535 euros y que xenerarán una inversión final de 1,9 millones d'euros en seis actuaciones que van crear trés nuevos puestos de trabayu y van caltener otros 17.

Ente los proyectos aprobaos güei na xunta celebrada nel Conceyu de Riosa destaca'l de la Sociedá de Cazadores de Morcín. Trátase d'un plan pa la recuperación del robecu na Sierra l'Aramo.

La entidá, que xestiona dende hai 16 años la práctica cinexética en Morcín, La Ribera y Riosa, considera que L'Aramo ye un llugar óptimu pa desarrollar actividaes de vixilancia de les especies cinexétiques y protexíes per mediu de dos guardes rurales que tien axustaos.

Poro, prevé entamar esta actuación rellacionada col robecu con unes xornaes de captura na reserva rexonal de Somiedu. Tres esto, va tresportase y soltase a los animales a la Sierra l'Aramo pa facer un posterior siguimientu pente medies de marcaxe con GPS. Según informó'l Grupu d'Acción Local, l'actuación tamién inclúi un estudiu de la caza como recursu turísticu.

Otra de les iniciatives aprobaes pol grupu ye l'acondicionamientu y meyora del campu de fútbol municipal que va executar el Conceyu de Morcín, que prevé implantar pación artificial y instalar sistema de llume y riegu.

Los cuatro proyectos restantes tán vinculaos col turismu rural. Ún d'ellos prevé la construcción d'apartamentos rurales en Llananzanes, nel conceyu d'Ayer. Trátase d'una aldea que taba abandonada y que se va revitalizar con esti plan turísticu. Amás, el Leader va ufiertar ayudes a dos cases d'aldea y un hotel de trés estrelles en L.lena. L'abertura d'estos cuatro nuevos establecimientos va dexar ampliar la ufierta d'agospios de la Montaña Central con 60 nueves places.