Los llagareros refuguen les prohibiciones a la publicidá de la sidra nel proyectu de Llei de Comunicación Audiovisual

UVIÉU, 12 de Marzu (EUROPA PRESS)

L'Asociación de Llagareros d'Asturies (ALA) refuga la redacción del artículu 18.3 del Proyectu de Llei Xeneral de Comunicación Audiovisual, mediante'l que se prohíbe "la comunicación comercial televisiva de bebíes alcohóliques con un nivel inferior a 20 graos cuando s'emita fuera de la franxa de tiempu ente les 20.30 hores y les 6.00 hores del día siguiente, nun siendo qu'esta publicidá forme parte indivisible de la compra de derechos y de la producción de la señal a espardir".

Según caltién el colectivu d'ellaboradores de sidra natural asturiana al traviés d'un comunicáu, resulta "manifiestamente inxusto" que se "vuelvan a entemecer" les bebíes tradicionales de baxa graduación alcohólica con bebíes destilaes, "inorando que les primeres gocen de fonderes referencies culturales y históriques y formen parte de dietes saludables, a xuiciu d'espertos d'incontestable solvencia".

"En momentos de necesaria espansión de la sidra natural preténdense atayar les posibilidaes d'espardimientu d'esta tradicional bebida, aplicando criterios tovía más restrictivos que los plantegaos na Directiva 2007/65 de la Unión Europea", afirmen.

Poro, los llagareros alerten "de los negativos efectos" qu'esta llei podría conllevar, de caltenese l'actual redacción, "non sólo pa la publicidá y espardimientu de la propia bebida en sí, dao que tamién afectaría al turismu gastronómicu, una actividá con gran potencialidá y tovía desarrollándose nel Principáu d'Asturies".

D'otru llau, apunten "a la hipocresía que supón la restricción d'horarios plantegada, cuando nesa mesma franxa horaria ye habitual y yá avezao programar conteníos violentos, escenes de sexu esplícitu o otra series d'escenes poco edificantes pa la población infantil, pa la que la programación apropiada suel esviase a les primeres hores de la mañana".

Los llagareros confíen en que la redacción "se modifique nel Congresu de los Diputaos nes próximes feches", y esperen que los diputaos asturianos "defendan una redacción distinta y compatible cola proteición de los menores".

A lo último, l'Asociación insiste nel so compromisu "col consumu responsables y moderáu de la sidra natural, asina como nel so inequívocu refugu al consumu de bebíes alcohóliques per parte de menores".