Lleva a Berlusconi a Estrasburgo por supuestu control antidemocráticu de televisión italiana

REUTERS

ROMA, 11 de Marzu (EUROPA PRESS/Gloria Moricu)

Una organización internacional de defensa de los Derechos Humanos presentó esti xueves un informe ante'l Tribunal Européu de Derechos Humanos d'Estrasburgo nel que denuncia l'escesu de poder que'l primer ministru d'Italia, Silvio Berlusconi, tien sobre la televisión nesti país.

"El control que'l primer ministru Silvio Berlusconi tien sobre la televisión n'Italia va contra los estándares democráticos europeos", afirma la Open Society Justice Initiative --financiada por George Soros-- nel so informe, nel que defende los derechos d'Europa 7, "al que se negó l'accesu a les emisiones mientres casi una década".

Según la organización, "esti casu destaca'l fracasu de los socesivos Gobiernos italianos al tratar col doble problema de la concentración del control y el conflictu d'intereses" nel ámbitu de la televisión.

El director executivu de la Open Society Justice Initiative, James A. Goldston, consideró qu'esta situación ye "inaceptable dientro d'una democracia, polo que llamamos al Tribunal Européu de Derechos Humanos a apoyar los principios del pluralismu nos medios de comunicación", añadió.

'Europa 7' llogró la concesión pa tresmitir a escala nacional nel añu 1999, pero hasta'l momentu tovía nun pudo facelo porque l'Estáu tovía nun-y asignó les frecuencies.

D'otra manera, el grupu Mediaset, que pertenez a Silvio Berlusconi, algamó caltener les frecuencies d'una de les sos televisiones, 'Rete 4', a pesar de qu'ésta nun llograre les concesiones pertinentes en 1999. Y esto, gracies en parte a les intervenciones realizaes polos sos socesivos gobiernos.

Amás de monopolizar el mercáu de la televisión privada, la organización denuncia'l control que Berlusconi, como xefe del Executivu, tien nestos momentos sobre la televisión pública italiana, la RAI. Ello ye que "al actual Gobiernu acusáronlu en repitíes ocasiones d'interferir nes decisiones editoriales de la RAI", recuerda la organización.