El MARM encarga un estudiu sobre los posibles impactos del sal que s'usa nes carreteres contra'l xelu

  El Ministeriu de Mediu Ambiente, Mediu Rural y Marín encargó al Centru d'Estudios y Esperimentación d'Obres Públiques (Cedex) un estudiu técnicu pa evaluar los posibles impactos que pue causar l'emplegu del sal contra l'acumuladura de xelu na rede viaria.

   Asina consta nuna carta unviada pola directora xeneral calidable y Evaluación Ambiental, María Jesús Rodríguez de Sancho, a Los Verdes d'Asturies, que se dirixieron al Ministeriu pa mostrar la so preocupación polos efectos del sal, puesto que consideren qu'afecta a la calidá biótica del suelu y l'agua, a los pavimentos, a los edificios, escome los elementos metálicos, perxudica a plantes y animales terrestres y a delles instalaciones y bienes.

   Na so respuesta, Rodríguez de Sancho estimó la suxerencia de la formación ecoloxista y diz que ta previsto que l'estudiu "se centre n'evaluar los posibles impactos d'esta práctica sobre distintos elementos bióticos y abióticos del mediu, con especial incidencia nos elementos más sensibles y nos llugares de mayor relevancia natural, amás de facer una revisión de les alternatives posibles al usu del sal, basada na esperiencia internacional sobre esta cuestión".

   El covoceru de Los Verdes d'Asturies, Eduardo Campomanes, señaló la so satisfaición pola respuesta del Ministeriu de Mediu Ambiente. Recordó que'l sal afecta a la vexetación y a la fauna, especialmente a los anfibios de les zones llenderes y les plantes, "que muerren o séquense". Apuntó qu'en tiempos antiguos el sal emplegábase pa dexar estériles les tierres de llabor de los pueblos enemigos.