El Muséu Arqueolóxicu va acoyer visites guiaes n'asturianu una vez al mes

Actualizado: miércoles, 13 diciembre 2017 14:40

UVIÉU, 13 Dic. (EUROPA PRESS) -

El Muséu Arqueolóxicu d'Asturies va acoyer a partir d'esti mes d'avientu y hasta'l xunu próximu un programa de visites guiaes n'asturianu. Trátase d'una actividá de baldre que quier dar continuidá a les "esperiencies exitoses" yá realizaes previamente de manera puntual y valir como "exemplu pa mostrar que la llingua asturiana pue usase en cualquier estaya de la vida", según indicó'l director xeneral de Planificación Llingüística y Normalización del Gobiernu asturianu, Fernando Padilla.

El director presentó esti miércoles esta actividá acompañáu del director del Muséu, Ignacio Alonso, qu'esplicó qu'estes visites continúen les "esperiencies mui positivies" realizaes previamente coincidiendo cola Selmana de les Lletres Asturianes y la que s'entamó en payares y avientu del 2016. Alonso, que calificó'l muséu que dirixe como "centru de la cultura material asturiana, dixo que s'echaben en falta estes visites "y más n'asturianu, porque hai publicu interesáu n'elles".

Per otru llau, Padilla afirmó que'l programa de visites guiaes ye un "exemplu más de normalización y tresversalidá pa mostrar que la llingua pue usase en cualquier estaya", amás d'una manera "d'averar la historia d'Asturies na llingua propia". Asina, esplicó que'l nuestru idioma, "una llingua moderna", val tamién "pa tresmitir cultura" y recordó l'éxitu de les esperiencies anteriores "con xente que quedó fuera". Una situación que na so opinión muestra l'interés de los ciudadanos en conocer los museos "al traviés de la llingua propia".

Les visites guiaes n'asturianu al Muséu Arqueolóxicu van principiar esti llunes 18 y esti martes 19 d'avientu pa centros escolares, nun va ser hasta'l sábadu 23 cuando s'abra'l públicu en xeneral. Asina van siguir hasta mayu del 2018, onde l'últimu vienres de cada mes va entamase una visita pa escolares de Primaria y Secundaria, mentes que'l sábadu van ser pal públicu en xeneral. Otra manera, en xunu, les visites escolares van ser el vienres día 15 y les abiertes al públicu xeneral un día depués.

Trátase d'una actividá de baldre, que se va facer n'horariu matinal y onde en cada visita van poder participar ente 25 y 30 persones reservando plaza previamente nel teléfonu 985 106 741 o nel corréu splnormalizacion@asturias.org . Una esperiencia que va tener continuidá a partir d'ochobre del 2018.

Asturianu ofrecido por