Noemí Martín pide disculpes a los ciudadanos polos retrasos na atención a los dependentes

UVIÉU, 11 de Marzu (EUROPA PRESS)

La conseyera de Bienestar Social y Vivienda del Gobiernu del Principáu d'Asturies, Noemí Martín, aprovechó güei la so intervención nel Plenu de la Xunta Xeneral del Principáu d'Asturies pa "pidir disculpes" a los ciudadanos polos retrasos que puean tar produciéndose mientres s'asitia al sistema deriváu de la llei d'autonomía personal y atención a les persones en situación de Dependencia.

Tres dirixise a ella la diputada del PP, Inmaculada González, Noemí Martín dixo que'l sistema ta "en construcción" y que va tardar n'estabilizase. "Los procedimientos son descomanadamente llargos", reconoció la dirixente rexonal, que dixo entender el "cabréu" de los afectaos. "Esto nun ye como facer una carretera, equí los plazos afecten a les persones directamente", comentó y recordó que'l fin de la implantación de la llei ta previstu pal añu 2015.

Sicasí, señaló que la so política nun queda en pidir esculpes y que ta intentando entainar al máximu tolos procedimientos. Esplicó que, a fecha 1 de marzu, les solicitúes qu'esisten son 29.729, habiendo yá 23.070 dictames, 15.600 con derechu reconocíu y 11.651 que reciben un serviciu o prestación.

Más de 4.000 persones siguen esperando a roblar el programa individualizáu d'atención de la dependencia (PIA). La media de tiempu que trescurre ente que se realiza la "valoración" y la firma del PIA ye n'Asturies de diez meses. L'oxetivu para Noemí Martín ye amenorgalu a seis meses.