Un conceyal del PP en Castrillón glaya nel Plenu que nun quier que-y llamen "aldeanu" por usar l'asturianu
UVIÉU, 1 Dic. (EUROPA PRESS) -
Los plenos de Castrillón, L.lena y Noreña aprobaron esti xueves instar al Conseyu de Gobiernu y a la Xunta Xeneral a abrir la reforma del Estatutu y incluir la oficialidá del asturianu. En Castrillón y Noreña'l PSOE abstúvose, mentes qu'en L.lena votó a favor. Estos tres conceyos súmense a los de Mieres, Xixón y Avilés a esta pitición.
La moción aprobada considera que ye'l momentu d'avanzar na oficialidá del asturianu como "elementu fundamental pa la so dignificación normativa y la so normalización social". Asina, encamienta al Gobiernu y a les distintes fuercies polítiques con representación parllamentaria a empezar un diálogu y llograr un consensu col fin de llograr esti oxetivu, "qu'acabaría cola reforma del Estatutu y la oficialidá de la llingua asturiana".
En L.lena la inicitiva presentóla Compromisu por L.lena, algamando l'apoyu tamién d'IX y PSOE, mentes que'l PP votó en contra. Per otru llau, en Noreña votáronla tolos grupos poponentes -Conceyu Abiertu, IX, Foru Asturies y Independientes por Noreña-, mentes que'l PP votó en contra y l'únicu conceyal del PSOE presente nel Plenu -de los tres colos que cuenta la formación en Noreña- abstúvose. Otra manera, en Castrillón votaron a favor los proponentes -IX y Castrillón sí Puede-, y en contra el PP y Ciudadanos, mentes que'l PSOE abstúvose.
Y ye que'l PSOE de Castrillón y Noreña solicitó pa votar a favor que s'eliminara'l puntu 2, onde s'encamienta al Gobiernu a abrir la reforma del Estatutu. Asina, el conceyal socialista en Castrillón, Javier González Fernández, afirmó que dende'l so partíu creen na oficialidá del asturianu, pero animó a Podemos y IX a impulsar una reforma del Estatutu dende la Xunta Xeneral porque teníen votos abondo pa facelo y nun había que pidilo al Conseyu de Gobiernu.
Nesi casu, González señaló que sí lo faen el PSOE va apoyalos. "La postura del PSOE a nivel rexonal ye apoyar la oficialidá, polo tanto cuente col nuestru votu nel casu de que la reforma s'impulse, polo tanto van tener 28 votos", dixo. Pal conceyal, la moción d'IX y Castrillón sí Puede yera, nesi momentu, "electoralista".
Onde nun hubo cambios foi dende les files 'populares'. Nos tres conceyos el PP votó en contra con un argumentariu centráu na "imposición", no "artificiosu" de la normativa académica, en que yera una demanda de "grupos minoritarios" con un espíritu "nacionalista y, mesmo, separatista" y con alusiones de contino a la situación catalana, como la posibilidá de que los comerciantes recibieren multes por nun rotular n'asturianu.
Esta moción aprobada polos plenos de L.lena, Castrillón y Noreña súmase a la que salió alantre nes últimes selmanes en Xixón y Avilés, que contarón col apoyu de Foru, Xixón sí Puede, IX y PSOE, nel primer casu, y PSOE, Somos Avilés, IX y Ganemos nel segundu. Amás, en xineru d'anguaño, Mieres aprobara una moción semeyante na que tamién s'encamentaba a Gobiernu y Xunta Xeneral a declarar la oficialidá, al igual que fixo Bimenes unos meses enantes, nel 2016.
POLÉMICA EN CASTRILLÓN
En tolos plenos hubo un intercambiu d'acusaciones ente partidarios de la oficialidá y el PP, pero foi en Castrillón onde se vivieron los momentos más tensos. Asina, la conceyala d'IX que defendió la moción, María del Mar González, tuvo que facer la so intervención n'asturianu y castellanu, porque'l reglamentu del Conceyu establez que namás pue facese nesta última llingua.
Aunque la conceyala avisó de que depués diba facer la intervención en castellanu foi interrumpida dende la bancada popular pol conceyal José Antonio Fernández, que se quexó de nun entender nada. Per otru llau, la conceyala de Castrillón sí Puede, Eva María Menéndez, fixo la so intervención namás n'asturianu, anque por esi motivu nun quedó rexistrada.
El conceyal del PP Pablo González-Nuevo Quiñones calificó l'usu del asturianu nuna Casa Conceyu como un "esperpentu" qu'esperaba que nun volviera a repetise. "Ye una llingua que nun ye oficial y creo que ye illegal", dixo Quiñones, qu'esixó cumplir la llegalidá y afirmó que tenía derechu a enterase de que se diz "na única llingua oficial qu'hai". Asina, indicó que nun entendió "mediu discursu" y que tampoco "nun quiero entendelu".
Mentes un cruz d'acusaciones ente'l conceyal popular y la mesma alcaldesa de Castrillón, Yasmina Triguero, sobre si un discursu n'asturianu se podía entender o non por un asturianu castellanofalante, el 'popular' José Antonio Fernández Alonso glayó en castellanu "yo nun quiero que me llamen aldeanu", lo que xeneró les crítiques d'IX y la sorpresa de l'alcaldesa, que recibió la so frase con un "¡qué fuerte!" ente rises.
