La Policía reprime con gas llarimosu a mozos encapuchaos en Grecia

ATENES, 11 de Marzu (Reuters/EP)

La Policía griega reprimió esti xueves con gas llarimosu a sobre mediu centenar de mozos encapuchaos qu'atacaron a los axentes con vares y-yos tiraron cachos de mármol qu'arrancaron de les escaleres del Bancu de Grecia, según responsables del Gobiernu d'aquel país.

Los xóvenes llanzaron tamién cócteles molotov, rompieron escaparates y quemaron cubos de basura, pero'l nivel de violencia foi muncho menor que nos disturbios del 2008, provocaos pol asesinatu d'un adolescente a manes de la Policía, que paralizaron la capital mientres selmanes.

Los encapuchaos llevaben banderes con símbolos d'izquierda y anarquistes y glayaben "que queme'l parlamentu". Un total de 16 manifestantes resultaron deteníos y dos axentes de Policía resultaron firíos, según un responsable del Gobiernu.

Quitando los citaos episodios foi una manifestación pacífica. Unes 23.000 persones marcharon peles cais d'Atenes pa protestar poles midíes d'austeridá anunciaes pol Gobiernu griegu: baxar el sueldu a los funcionarios, subir los impuestos, conxelar les pensiones y planes p'aumentar la edá de xubilación. Los trabayadores del sector públicu y priváu participaron nuna güelga nacional.

La mayoría de los griegos cree que, a pesar de les protestes, el gobiernu socialista va siguir alantre coles sos midíes, acordaes la selmana pasada tres meses de discutinios cola Unión Europea y presiones de los mercaos financieros. Los críticos dicen que'l plan, que conlleva una rebaxa de 4.800 millones d'euros, va afectar a les persones menos indicaes nun país con corrupción xeneralizada y evasión d'impuestos.

"Les midíes son inxustes (...) nun podemos soportales, tenemos fíos, familia y precisamos atopar dineru p'apoyalos", dixo un trabayador del sector sanitariu de 60 años, Odysseas Panagopoulos. "Los bancos y los ricos tendríen de pagar esta crisis", añadió.

La güelga, convocada polos sindicatos que representen a la metá de los cinco millones de trabayadores griegos, fizo que los aviones se quedaren en tierra, que los barcos quedaren atracaos, que les escueles y hospitales permanecieren zarraos y paralizó el tresporte públicu.

Amás, na segunda güelga xeneral en dos selmanes, munchos llugares arqueolóxicos y museos nun abreron les sos puertes a los visitantes y aplazóse la publicación de los datos del PIB y del paru. Tampoco hubo noticies na televisión y na radio, dao que los periodistes secundaron la güelga. Bancarios, bomberos, recaudadores d'impuestos y hasta policías participaron nes manifestaciones.

Los datos oficiales sobre participación diferénciense abondo de les estimaciones de los sindicatos. Responsables del Ministeriu del Interior dixeron qu'un 15 por cientu de los funcionarios secundaron la convocatoria, mientres el so sindicatu asitió la participación nun 65 por cientu.