El PP alvierte que sólo'l 33% de los inmigrantes que viven n'Asturies coticen a la seguridá social

UVIÉU, 03 de Xunetu (EUROPA PRESS)

El Grupu Parlamentariu Popular del Principáu d'Asturies informó güei de que sólo una media del 33% de los inmigrantes que viven n'Asturies coticen a la Seguridá Social. La formación exixó a la Inspeición de Trabayu que controle la situación d'esti colectivu y diferencie a los bonos empresarios de los que "nun merecen" llamase asina.

Denunciólo públicamente en rueda prensa la diputada del PP, Belarmina Montes Moro, qu'ofreció'l datu de que los 1.085.110 habitantes d'Asturies, 47.012 son estranxeros censaos na rexón nesti momentu. D'ellos, esplicó que la cifra de persones que coticen a la seguridá social yera de 15.749, un 33%, mientres que la cifra de paraos yera de 4.569. Destacó amás que los inmigrantes contrataos el pasáu mes de mayu fueron 1.835 persones, de los que 1.579 fueron temporales y 256 fixos. Señaló qu'unos 2.100, el 4,04% del total del colectivu, tán en paru sin derechu a nengún tipu de prestación.

Pa Montes, "los númberos canten y exixen un esclaramientu que pidimios a les instituciones responsables del cumpimientu de les lleis, yá seya'l Ministeriu de Trabayu o la Inspeición Llaboral". "Toca diferenciar a los empresarios que dignifiquen el so oficiu de los que nun merecen el nome d'empresarios", protestó. Ante esta situación, pidió que "se pongan en marcha tolos mecanismos necesarios qu'eviten la esplotación llaboral d'esti colectivu, y que vixilen que nun se violen los sos derechos". Demandó que s'intensifiquen los controles, porque son les persones "más indefenses na sociedá, situación que cobra tintes de mayor gravedá cuando falamos d'inmigrantes sin identificación, sin nengún nivel de proteición".