El PP faise cola alcaldía de Siero gracies al apoyu de la Plataforma Vecinal de la Fresneda y del PINSI

UVIÉU, 12 de Marzu (EUROPA PRESS)

El plenu del Conceyu de Siero escoyó a José Antonio Noval (PP), col apoyu de la Plataforma Vecinal de la Fresneda y del Partíu Independente de Siero (PINSI), como nuevu alcalde, en sustitución de Juan José Corroles, que presentó la dimisión hai un mes dempués d'estrellar el coche oficial contra una glorieta y triplicar la tasa d'alcohol dexada.

La votación quedó de la siguiente manera: once votos a favor de la candidatura de José Antonio Noval (ocho votos del PP, ún de la Fresneda y dos más del PINSI). Asina, llogra la mayoría absoluta.

La candidatura del socialista de Julio Carretero, llogró cuatro apoyos: los de los conceyales averaos al SOMA. Los otros cuatro ediles del PSOE votaron en blancu, igual que Conceyu, de Llugones.

Pela so parte, l'ex teniente d'alcalde socialista, Ángel García 'Cepi', felicitó al entamu de la so intervención al nuevu alcalde y díxo-y que la oposición que va realizar el PSOE va ser distinta a la del PP. "Nós vamos exercer una oposición con responsabilidá, constructiva; plantegando una alternativa", comentó.

El conceyal socialista señaló que'l PP de Siero tuvo muncha suerte porque l'anterior equipu de Gobiernu dexó-y muncho fecho". "Un presupuestu municipal aprobáu --sin los votos del PP-- y con grandes obres en marcha del Plan A y el Plan E".

"Ofrézo-y la mio mano pa collaborar en tolo que faiga falta en beneficiu de los vecinos de Siero y deseo muncha suerte na so nueva etapa como alcalde", añadió 'Cepi' dirixiéndose a José Antonio Noval.

Tolos grupos del Consistoriu sierense aplaudieron y felicitaron al rexidor al ocupar el so puestu al mandu de la alcaldía. N'especial, el representante del Partíu Independente de Siero (PINSI), Juan Camino, que señaló que pal so partíu "los intereses del conceyu tán siempres penriba de los intereses particulares".

"Dende PINSI apostemos por caltener la gobernabilidá en perxuiciu de la especulación sobre la rentabilidá de los votos. La nuesa oposición siempre ye constructiva", añadió Camín.

Pela so parte, el voceru de la Plataforma Vecinal de La Fresneda, José Carlos García de Castro, señaló que'l so sofitu al PP débese a la responsabilidá del so grupu pa caltener la estabilidá nel Conceyu.