Profesores de 'llionés' piden al Principáu que recorte "fuertemente" el presupuestu de l'Academia de la Llingua

UVIÉU, 04 de Marzu (EUROPA PRESS)

L'Asociación de Profesores y Monitores de Llingua Lïonesa pidió güei al Gobiernu del Principáu d'Asturies que "recorte fuertemente'l presupuestu de l'Academia de la Llingua Asturiana (ALLA), dao que paez que-yos sobre'l dineru con que pagar profesores y material pa xenera conflictos y malestar n'otra Comunidá Autónoma". El colectivu acusó a la institución de "xenerar un conflictu territorial" por collaborar cola organización d'un cursu de llingua asturlleonesa en Ponferrada.

Al traviés d'un comunicáu, l'asociación aseguró que l'Academia unvió "profesoráu dende Asturies que nun tien el Títulu Oficial de Monitor de la Llingua Llïonesa, cuando en Lleón hai 30 profesores titulaos". Sin embargu, ayeri l'académicu asturianu Xosé Antón González Riaño, que realizó les xestiones referentes al cursu de Ponferrada, aseguró que'l profesor va ser un filólogu lleonés que va respetar les variantes de la zona. Amás, esplicó que l'ALLA únicamente se llendó a atender a una solicitú de collaboración de l'asociación La Caleya, organizadora del cursu, y del Conseyu Comarcal d'El Bierzu, collaborador de l'actividá.

Sin embargu, l'asociación afirma que l'Academia ta "escediendo les sos competencies, que llenden el so ámbitu territorial al Principáu". "L'Academia de la Llingua Asturiana ye un organismu dependiente del Gobiernu asturianu, y como tal el so marcu d'actuación lléndase a esti espaciu xeográficu, anque les sos actitudes nos últimos tiempos paezan más bien les d'un 'lobbie' chantaxista cola Alministración que les d'un aparte de la propia alministración", aseguró.

"La Comunidá Autónoma de Castiella y Lleón reconoz nel so estatutu sólo al lleonés y al gallegu", afirma'l comunicáu. "Nesti sen", añade, "dende la Universidá de Lleón, xunto a les Alministraciones públiques lleoneses, se formaron a los Monitores Titulaos de Llingua Llionesa, que son, nestos momentos, los que tán exerciendo'l llabor docente nos cursos de lleonés, nel ámbitu territorial de la Comunidá Autónoma de Castiella y Lleón". "L'actitú de l'ALLA de 'unviar' el so profesoráu de confianza ye un claru exemplu de cacipladura territorial", opinó.

MODELU LLEONÉS

L'asociación ofreció a "l'Academia de la Llingua Lleonesa Asturiana y a Ana Cano'l 'modelu lleonés', un modelu de consensu social, un modelu d'optatividá, un modelu onde nun pretendemos imponer la llingua a naide nin obligar a que s'estudie lleonés, un modelu de consensu políticu nel que tolos lleoneses tamos d'acuerdu, por si quier aplicalo n'Asturies".

"Dende la nuesa organización mos plantegamos si estes imposiciones que pretende facer l'ALLA en materia educativa en Lleón son una muestra de pa qué quieren la oficialidá n'Asturies. ¿Tal vez pa imponer, como dicen na so nota, a 'xente de confianza'? ¿La llingua ye pa ellos un negociu?", entrugó'l colectivu.

L'asociación pidió a l'Academia qu'abandone "cualquier iniciativa espansionista hacia la llingua llionesa en Lleón, Zamora o Salamanca y que se centre nel so llabor de tentar de defender la oficialidá del bable, que falta fai, y a que meyore la so normativa pa que nun algame la contestación que nestos momentos tien, especialmente nel occidente d'Asturies".

CARTA ABIERTA D'UN PROFESOR

Raúl Sánchez Prieto, profesor del Departamentu de Filoloxía Moderna de la Universidá de Salamanca, tamién s'unió a la folada d'ataques contra l'Academia, entamada ayeri pola asociación berciana El Toralín, con una carta abierta a los gobernantes y políticos asturianos pa que "dexen d'apoyar esti tipu de cacipladures, comparables a les qu'exercen grupos minoritarios nacionaliegos gallegos nel occidente del Principáu".

Sánchez mostró'l so "más absolutu refugu ante l'actitú arrogante y ultranacionalista de l'Academia de la Llingua Asturiana". Según el profesor, "l'ALLA tenta d'imponer el fracasáu modelu llingüísticu asturianu a los falantes d'una modalidá llingüística distinta, el lleonés". Poro, pidió al Principáu, que "ponga fin a les perdes de papeles" d'esta institución.