Los representantes del PP de Mieres abandonen la comisión de Cultura pola presentación de dos espedientes n'asturianu

   Los representantes del Partíu Popular de Mieres abandonaron güei la comisión informativa de Cultura ante la presentación per parte de la presidenta de la comisión, la edil Diana González, de dos espedientes n'asturianu, concretamente los relativos al premiu Teodoro Cuesta, de poesía, y a la entrega de premios del Memoria Silvino Argüelles.

   Según esplicó la edil popular Elías Álvarez al traviés d'un comunicáu de prensa, "tres solicitar la traducción" d'estos documentos "al idioma oficial na comunidá autónoma asturiana, l'español", y de que la repuesta d'esti pidimientu fuere negativa, los miembros del PP abandonaron la comisión "al alcontrase en clara indefensión".

   Pal conceyal, esta situación ye consecuencia de "nun entender los espedientes presentaos nun dialectu non oficial", polo que llamentó que "nun se tuviere la deferencia de meter el mesmu espediente n'español".

   Álvarez criticó'l "empecinamientu" per parte de la responsable de la comisión y denunció que nun s'aceptare la solicitú de "tener accesu a la información municipal que se diba aldericar nel idioma reconocíu nes instituciones asturianes".

   N'opinón del conceyal, el debate sobre la oficialidá del asturianu debe treslladase a la Xunta Xeneral del Principáu y dexó claro que "nun son formes el tratar de metar nel conceyu esti debate a calzador".