El Serida y l'IRTA realicen un estudiu que finca les bases pa la recuperación del cultivu del ablanu

Actualizado 10/02/2010 18:01:17 CET

UVIÉU, 10 de Febreru (EUROPA PRESS)

Un estudiu realizáu n'Asturies por investigadores del Serviciu Rexonal d'Investigación y Desarrollu Agroalimentariu (Serida) y del Institutu de Recerca i Tecnologia Agroalimentaries (IRTA) de Cataluña describe la situación actual del cultivu del ablanu xunto colos trabayos realizaos hasta'l momentu pa conocer y conservar les variedaes llocales como pasu previu pa la recuperación y meyora del cultivu n'Asturies. "L'estudiu pue suponer un puntu de partida pa recuperar y potenciar un cultivu mui arraigonáu nel mediu rural asturianu", según el Serida.

Los investigadores del Área de Cultivos Hortofrutícoles y Forestales del Serida, Juan José Ferreira, Noemí Trabanco, Elena Pérez-Vega y Ana Campa, xunto con Mercé Rovira del IRTA - Mas de Bover son los autores d'un estudiu nel que constaten "la importante riqueza de variedaes d'ablanu n'Asturies, como consecuencia d'años de selección per parte de los agricultores".

Asina lo señaló el Serida nuna nota prensa, na qu'amás, destacó que los científicos del Serviciu tán trabayando na conservación de les varidaes llocales d'ablanu pa identificar les que meyor s'adauten a les condiciones llocales de cultivu y que tengan unes característiques frutícoles superiores.

Según Ferreira, responsable del Programa de Xenética Vexetal, "la disponibilidá d'estes varidaes xunto cola diferenciación de les producciones llocales, pue suponer un puntu d'entamu pa la recuperación y conservación d'un cultivu ta arraigonáu nel mediu rural asturianu".

La producción ablanera más importante d'Asturies llocalízase nel conceyu de Piloña y nos sos conceyos llenderos, principalmente en Casu, Sobrescobiu, Parres, Nava, Cabranes y Ponga. La collecha destínase xeneralmente al autoconsumu y los escedentes viéndense nos mercaos llocales.

Nesti momentu, los investigadores del Programa de Xenética Vexetal del Serida tán trabayando fundamentalmente en dos llinies: na conservación de les varidaes llocales y na caracterización morfolóxica y agronómica. L'oxetivu ye identificar les meyores varidaes frutícoles y les que meyor s'adauten a les condiciones d'Asturies.

Esta web utiliza cookies propias y de terceros para analizar su navegación y ofrecerle un servicio más personalizado y publicidad acorde a sus intereses. Continuar navegando implica la aceptación de nuestra política de cookies -
Uso de cookies