UVIÉU, 10 de Marzu (EUROPA PRESS)
Los sindicatos de la Xunta de Personal Docente Non Universitariu d'Asturies (Suatea, UXT, ANPE, Comisiones Obreres y CSI-CSIF) van convocar una fuelga en tola enseñanza pública non universitaria si'l Gobiernu del Principáu nun retira'l so modelu d'evaluación del profesoráu que ta poniendo en marcha. Les centrales consideren qu'esti procesu "nun tien nada que ver cola docencia", obliga a "a los directores de centros a mentir, a falsiar y a chivase" de los sos compañeros, y ye imposible realizar en tiempu y forma.
Beatriz Quirós, presidente de la Xunta de Personal, y responsable de Suatea, ofreció güei una rueda prensa pa referise a esti asuntu acompañada por un representante de cada sindicatu miembru d'esti órganu. Ayeri, tanto a ella como otros compañeros del restu d'organizaciones desagospiólos la Policía Nacional de la Conseyería d'Educación, onde calteníen un enzarru pa exixir la retirada d'esti modelu.
Foi la primer de les aiciones que preparen les organizaciones por este reivindicación. La siguiente va ser una manifestación,e l próximu martes, de magar les 18.00 hores na Estación de Renfe d'Uviéu; y en casu de que nun haya acuerdu, va haber una fuelga enantes de qu'acabe'l presente segundu trimestre, según anunció Quirós.
El procesu evaluador consiste nel siguimientu, per parte de los directores de los centros, de l'actividá de los docentes. Dichu siguimientu ha espeyase na cumplimentación d'unos formularios, nos qu'existen apartaos "imposibles de cumplimentar", y pa los que los plazos establecíos "nun son los apropiaos", según los sindicatos. Amás, les organizaciones denunciaron en delles ocasiones el carácter "arbitrariu y suxetivu" de munchos de los criterios establecíos en dichu procesu.
Según la responsable de la Xunta, "s'obliga a los directores, al traviés de los centros de calificación del profesoráu, a realizar un informe nel que van tener que falsiar datos, mentir y facer delación". "Se-yos pon nuna tesitura mui dura", añadió, tres recordar que "sólo se realiza nos centros públicos".
Tamién criticaron el cursu 'on line' de la evaluación de diagnósticu del profesoráu y del alumnáu que los profesores deben realizar en dichu marcu d'evaluación, y que "ta xenerando malestar nos centros". La representante sindical aseguró que ye imposible realizalu pol so ampliu conteníu (600 fueyes de documentación "enguedeyosa").
Dende la parte sindical s'asegura que pel momentu se desconocen les consecuencies que dicha evaluación pue tener pal profesoráu y les sos condiciones llaborales.
Los sindicatos caltuvieron un conceyu ayeri col conseyeru d'Educación, José Luis Iglesias Riopedre, enantes de desagospialos la Policía Nacional, a la que llamó'l propiu responsable autonómicu, según la sindicalista. En dichu alcuentru, según Quirós, "el conseyeru reconoció'l caos que se ta produciendo", por estos asuntos.
Recordó tamién que los profesores "yá se somenten a procesos d'evaluación constantemente". "La primer evaluación son les durísimes oposiciones que tenemos que superar, y dempués les evaluaciones de la inspeición educativa, de les programaciones y de los propios centros", esplicó.
Esti otru procesu evaluador, el puestu en marcha pol Principáu, ye, según los sindicatos, "una imposición de la Conseyería d'Alministraciones Públiques, que creó un procedimientu pa tolos funcionarios y non especificu pa los docentes". Los sindicatos quieren que se retire, no qu'afeuta a los profesores non universitarios, y que se convoque la mesa sectorial d'educación, na que negociar otru modelu coles organizaciones que representen a los trabayadores de la docencia.
