UVIÉU, 26 de Febreru (EUROPA PRESS)
Les Conseyeríes d'Educación y Ciencia, y de Cultura y Turismu organizaron pa esti cursu actividaes culturales en centros educativos de Primaria y Secundaria p'apoyar la promoción de la llingua asturiana y del gallego-asturianu, que diba implicar a unos 8.600 alumnos, según informó'l Principáu nuna nota prensa.
La ufierta d'actividaes pal alumnáu de Primaria inclúi once conciertos del grupu Xentiquina, nos que los estudiantes participen activamente dempués de trabayar los testos y la música de los cantares, y una decena d'actuaciones del grupu teatral 'Asturmitomanía', que recupera de manera lúdica los raigaños mitolóxicos asturianos.
Ta previsto que 28 centros educativos de Primaria y sobre 4.000 alumnos participen nos conciertos de Xentiquina, mientres que les funciones teatrales van llegar a 2.000 estudiantes de trece centros.
Pal alumnáu d'Educación Secundaria Obligatoria y Bachilleratu, que cursa llingua asturiana, s'ufierten esti cursu 12 conciertos didácticos de cantu tradicional asturianu. Esti tipu de recitales, pensaos y dirixíos pola intérprete de tonada Anabel Santiago, tien por fin l'espardimientu y promoción de la música tradicional asturiana de magar los cantares de los compositores del nacionalismu Musical Asturianu (1900-1936). Esta iniciativa va implicar esti cursu a 13 centros educativos y unos 2.000 alumnos.
Les actividaes de promoción van llegar tamién a los alumnos de gallego-asturianu. Asina, unos 400 estudiantes d'esta materia en primaria van disfrutar de dos actuaciones del grupu de títeres Yheppa y 200 alumnos de Secundaria nun conciertu didáctiu del grupu de Folk Mezá.
