UVIÉU, 6 de Xunetu (EUROPA PRESS)
Gonzali Producciones entamó'l doblaxe al asturianu del llargumetraxe 'Incepton', la película del 2010 estrenada n'España como 'Origen', dirixida, escrita y producida por Christopher Nolan, que protagonicen Leonardo DiCaprio, Ellen Page, Joseph Gordon-Levitt, Ken Watanabe, Tom Hardy, Marion Cotillar, Cillian Murphy, Tom Berenger y Michael Caine. N'asturianu titularáse 'Orixe'.
El doblaxe tará dirixíu por Illán Gonzali, y cola participación d'una trentena d'actores, va ser emitíu pola Televisión del Principáu d'Asturies el próximu 8 de setiembre. Trabayarán tamién nesti proyeutu dellos alumnos de la Escuela de Doblaxe d'Asturies.
Estrenada nel 2010 consiguió 4 Premios Óscar por Meyor Fotografía, Meyor Mezclienda de Soníu, Meyor Edición de Soníu y Meyores Efectos Visuales. Tamién llogró 3 premios BAFTA por Meyor Diseñu de Producción, Meyor Soníu y Meyores Efectos Especiales.
L'argumentu céntrase en Dom Cobb (Leonardo DiCaprio), un lladrón especialista nel arte de la estracción de secretos mientres l'estáu de suañu, cuando la mente ye más vulnerable. La so habilidá conviértelu nuna acobiciada referencia del espionaxe corporativu, pero coles mesmes fai d'él un fuxitivu internacional y va llevalu a perder tou lo qu'ama. Un trabayu últimu podría devolve-y la so vida si, en llugar de robar una idea, llogra xunto col so equipu enllantar una, anque tendrá d'enfrentase a un peligrosu enemigu que paez predicir cada unu de los sos movimientos.
La productora ye responsable del doblaxe profesional n'asturianu dende'l 2010, con 16 trabayos realizaos hasta agora, ente los que destaquen 'Los viaxes de Gulliver' (2010), 'El tercer home' (2011), 'McLintock' (2011), 'La nueche de los muertos vivientes' (2012), 'El rostru impenetrable' (2013) o 'Harry el suciu' (2014), estos dos últimos, emitíos delles vegaes pola televisión autonómica. A esi total hai qu'añedir 'Diez negrinos' y un capítulu de 'Woody Woodpecker', que tán en procesu de doblaxe.
