El xuez Serrano llamenta l'enquistamientu en democracia d'una "intolerable dictadura de xéneru"

UVIÉU, 12 de Marzu (EUROPA PRESS)

El Maxistráu Xuez del Xulgáu de primer Instancia númberu 7 de Sevilla, Francisco Serrano, criticó güei n'Uviéu que dientro del texíu democrático español "ta enquistándose una intolerable dictadura de xéneru" qu'impón un pensamientu "únicu" de lo políticamente correcto. "A fuerza de repetir que la muyer sigue tando discriminada acabamos creyéndolo y eso ye volver a plantegamientos machistes d'hai 40 años", defendió.

Serrano participa güei nel Colexu d'Abogaos d'Uviéu nuna xornada titulada 'La discriminación na Llei de Violencia de Xéneru y la so incidencia nos procesos de Familia', xunto al xuez Ángel Luis Riolo Izquierdo, titular del Xulgáu de primer Instancia númberu 8 de Xixón y Antonio Díaz Solís, abogáu y doctor en Derechu.

CRÍTIQUES "INQUISITORIALES Y LLAMENTABLES"

Al entamu de la so ponencia, el maxistráu sevillanu consideró que les crítiques a la xornada procedentes d'una asociación d'abogaes pola igualdá, suponen "una llamentable coacción a la llibertá" y valoró les posibilidaes de correxir y meyorar qu'ufierte l'alderique. "Que te prohíban espresate nun foru públicu ye inquisitorial".

No referente a la Llei Orgánica de Violencia de Xéneru (LOVG), apuntó que cualquier llei discriminatoria ye "mala", con independencia del axetivu qu'acompañe a la palabra discriminación, y pidió redefinir el testu y el conceutu de maltratu y tratar "una llei integral de protección nel ámbitu domésticu, como esiste n'otros países".

Coles mesmes, mostróse partidariu d'escorrer y castigar los abusos a la mesma, porque "nun ye lo mesmo protexer a diez qu'a 100" y porque permitiría que los beneficios, "hasta en mayor cuantía", los reciba'l que efectivamente ye víctima de maltratu.

Como exemplu, refirióse a les situaciones de separación o divorciu nes qu'ambos integrantes de la pareya se falten y nes que'l fechu de que l'home manifieste la so voluntá de "lluchar a muerte polos fíos" considérase una coacción o amenaza, en llugar d'un conflictu ente iguales. "Si se viera asina, dexaríense fuera'l 90 por cientu de los casos de maltratu", aseguró.

Llamentó, a lo último, que n'España se llame igualdá a la discriminación, lo que, al so xuiciu, ye un neollinguaxe característicu del nazismu. Nesti capítulu, precisó que la igualdá ye "una entelequia" que tien de siguir de guía, pero "nun pue esistir porque nun somos amapoles; somos persones".

MALTRATADOR Y BUEN PADRE

Pela so parte, el xuez de Xixón Ángel Luis Riolo, consideró que la LOVG ye "bien discriminatoria para la muyer, pal home y pa los fíos" y defendió que se reforme porque "nun tien de castigar, sinón prevenir y erradicar el maltratu". Ente otros aspectos, criticó que'l testu nun contempla la graduación del maltratu nin considera que l'autor d'un maltratu menor puea ser una buena madre nin, "menos tovía, un buen padre".

Pal maxistráu, la llei tenía un espíritu y unes intenciones "buenísimes", pero quedaron pel camín". "Dependiendo de si lleváis a un home o a una muyer al xulgáu de familia vais al ésitu o al infiernu", comentó-y a los abogaos asistentes.

"Nun almito los calificativos de positiva o negativa, discriminar nun ta permitío n'España y si se discrimina aténtase contra'l principiu d'igualdá que recueye la Constitución", sorrayó.

Pal xixonés la llei da preferencia al aspeutu punitivu, sin tratar midíes educatives nin preventives. "Nun se ta faciendo nada; lo único que queremos ye meter a la xente en prisión y alloñala de los sos fíos y de la so casa", recalcó.

HOMICIDIOS "PIADOSOS"

Per otra parte, Campo defendió que tienen d'escluyise del conceutu de violencia de xéneru y del tratamientu xudicial que lo caracteriza, casos como'l de los crimes cometíos por enfermos mentales y por alguna de les partes de pareyes de vieyos aquexaos d'enfermedá, a los que se refirió como "homicidios piadosos", pero en nengún casu maltratos nin violencia de xéneru. "Nun pongamos sexu o xéneru al maltratu y trabayemos pa desanicialu", reivindicó.