UVIÉU, 17 Abr. (EUROPA PRESS) -
La Comisión d'Educación y Cultura de la Xunta Xeneral votó l'incumplimientu na ellaboración d'un Plan de Dignificación del Asturianu, colos votos a favor de Podemos Asturies, IX y Foru. Mentanto, PP y Ciudadanos astuviéronse y el PSOE votó en contra.
El plan tendría que tenelo ellaboráu'l Gobiernu autonómicu como aprobó'l Plenu de la Cámara n'ochobre del 2015 colos votos de PSOE, Podemos Asturies, IX y Foru.
Nun ye la primer vez que la Comisión trata sobre la redacción d'esti Plan. Asina, yá se pidiera información al Executivu autonómicu sobre la so tramitación n'abril y n'ochobre del añu pasáu. Na primer ocasión, la información nun entró nel rexistru de la Cámara, mentes que depués de la solicitú d'ochobre, el Gobiernu rexistró na Cámara la información el 27 de payares.
Al recibir respuesta, la diputada d'IX Concha Masa solicitó que se llevara a incumplimientos, polo que la Comisión determinó esti martes que s'incumplió la Resolución 20/X, de 16 d'ochobre de 2015, adoptada pol Plenu de la Xunta Xeneral, sobre presentación d'un Plan de Dignificación de la Llingua Asturiana.
La redacción d'un Plan alcordóse'l 16 d'ochobre del 2015 na Xunta Xeneral colos votos a favor de PSOE, Podemos Asturies, IX y Foru Asturies, mentes que'l PP votó en contra y Ciudadanos astúvose.
El documentu encamentaba al Conseyu de Gobiernu a aprobar, enantes del final del periodu de sesiones próximu, un plan de dignificación y normalización de la llingua asturiana que contenga un conxuntu d'acciones urxentes p'algamar la so dignificación sociollingüística, la so protección y la so promoción.
