Bilboko Udal Musika Eskolak kontzertu batekin ospatuko du asteazkenean bere 25. urteurrena

BILBO 28 May. (EUROPA PRESS) -

Bilboko Udal Musika Eskolak ikasturte akademikoa agurtuko du asteazkenean, maiatzaren 30ean, ikasturte amaierako ohiko kontzertuarekin. Gainera, ikuskizuna Euskalduna Jauregiaren auditoriumean izango da, eskolako 25. urteurrena ospatzeko, Bilboko Udalak jakinarazi duenez.

Ospakizunen ardatza kontzertua izanik, 300 musikari baino gehiago igoko dira eszenatokira (sail guztietako ikasle nahiz irakasleak), Doris Palao Dantza Eskolako ikuskizun batekin lagundurik. Hitzordua arratsaldeko 19:00etan izango da, eta bertaratu nahi duenak gonbidapenak (bi pertsonako) aurkeztu beharko ditu soilik. Gonbidapen hauek Euskaldunako txarteldegian jaso daitezke (17:00etatik 20:00etara).

Urteurrena eta kontzertu honek aurreko edizioetan izandako arrakasta ikusirik, Euskalduna Jauregiaren auditoriumera eraman dute, 2.100 pertsonentzako edukiera duelako. Beste behin, ikuskizunaren protagonista nagusiak Musika Eskolako neska-mutilak eta irakasleak izango dira, eskainiko duten errepertorio zabalarekin.

Musika estilo ezberdinetatik ibilbide bat eskainiko dute eta konposizio klasikoak eta herrikoiak, filmetako soinu bandak eta rock eta pop arrakastak izango dira entzungai. Euskal jatorrizko abesti herrikoiak ere ez dira faltako. Errepertorio zabal horrez gain, sail desberdinetako zenbait ikaslek batera interpretatu ahal izateko propio sortutako bertsioak interpretatuko dituzte.