BILBO, 7 (EUROPA PRESS)
Nazio Batuek 2012. urtea Kooperatiben Nazioarteko Urte izendatu dute, eta Eusko Jaurlaritzak aldarrikapen horrekin bat egitea erabaki du. Erabaki horrek babesa ematen die kooperatiben mugimenduari eta Euskadiko gizarte-ekonomiaren sektorea osatzen duten enpresa guztiei, Jaurlaritzako iturriek adierazi dutenez.
"Kooperatiba enpresek mundu hobea eraikitzen laguntzen dute" goiburupean, Nazio Batuek kanpaina bat bultzatu dute mundu osoan, kooperatibek pobrezia murriztuz, lanpostuak sortuz eta gizartea sustatuz egiten duten ekarpena nabarmentzeko.
Nazio Batuen ebazpenak gobernuak bultzatu nahi ditu kooperatiben hazkundea eta iraunkortasuna sustatu dezaten, eboluzio azkarra izaten ari den egungo testuinguruan; izan ere, agerian geratu da lagungarriak direla herrialdeen garapen ekonomiko eta sozialaren bidean. Nazioarteko erakundeak kooperatiben gaitasunak baliatu daitezen nahi du, kalitatezko ekoizpen-lanpostuak sortzen dituztelako eta gizarteratze handiagoa eragiten dutelako.
Jaurlaritzatik adierazi dutenez, XX. mendearen hasieratik Euskadiko kooperatibismoa asko errotu da gure herrialdean, lan elkartuaren formula aukeratuz batez ere, eta industriaren sektorean garatuz bereziki. Horren emaitza izan da "Mondragon Esperientzia" deiturikoa, mundu osoan ospe handia duena.
Euskadin kooperatibak izaten ari diren esperientzia, gizarte-ekonomiako "kideekin" batera, enpresa-heldutasunera iritsi da, eta horren emaitza da Euskadiko ekonomian duten zuzeneko eragina: BPGaren %4,3 (industrian %10 inguru) eta enpleguaren %7,7.
Eusko Jaurlaritzako Enplegu eta Gizarte Gaietako Sailak urtero egiten duen erroldaren arabera, 2011. urtearen amaieran Euskadin 2.074 kooperatiba-sozietate (lan elkartuko 1.378 eta gainerako modalitateetako 696) eta 2.108 lan-sozietate zeuden.
Kokatzen diren lurraldearen garapenean kooperatibek duten inplikazioak eta sortutako aberastasunaren banaketa bidezkoagoan duten eraginak gizarte solidarioagoa eta orekatuagoa sustatzen dute, eta bizi-kalitatearen estandarrak hobetzen dituzte.