O avogado de Cobián di que a "mentira" de Dorribo "pon en tea de xuízo o posible sostemento da causa"

LUGO, 8 Feb. (EUROPA PRESS) -

O avogado Ulises Bértolo, que representa o exdeputado do PP Pablo Cobián, asegurou que "é mentira todo" o que declarou o empresario Jorge Dorribo en relación ao seu cliente e argumentou que iso "pon en tea de xuízo o posible sostemento da causa" sobre as declaracións deste empresario farmacéutico, principal imputado na 'Operación Campéon'.

"Sei perfectamente que é mentira todo o que declarou Dorribo con respecto a nós", expuxo o avogado de Cobián, quen dimitiu como deputado a raíz de ser unha das persoas sinaladas polo empresario farmacéutico polo suposto cobramento de comisións irregulares. Por iso, este letrado cuestionou que a causa poida sosterse sobre as declaracións do empresario farmacéutico.

"Hai unha cousa que é importante, que é que a constancia dunha mentira que ataca ao núcleo das imputacións que se realiza contra un dos políticos aos que supostamente di que deu diñeiro. Iso afecta á veracidade e credibilidade da declaración deste señor con respecto a todos os imputados na causa por estes feitos", expuxo en referencia á información que este mércores publica 'El País' en relación a que Dorribo enganaría a instrutora da 'Operación Campeón', a xuíza Estela San José, para conducir a que se acusase ao exministro José Blanco de suborno.

Ulises Bértolo sinalou que a defensa de Pablo Cobián achegou "documentación e probas abondas para acreditar" a súa inocencia, e a iso agregou que as evidencias de que Dorribo mentiría en relación a José Blanco "xa pon en tea de xuízo o posible sostemento da causa sobre a declaración deste señor".

Así, se congratulou "moito" de que, con esta información, "se puidera acreditar de novo, que efectivamente Dorribo mentiu nas súas declaracións". "Desta circunstancia nós non tiñamos dúbidas. Xa presentaramos no seu día ante o xulgado de instrución en Lugo, abundante documentación e probas que acreditaban esas mentiras", agregou.

LEVANTAR O SEGREDO DE SUMARIO

Por conseguinte, puxo en dúbida que as declaracións de Jorge Dorribo, ao fío do que publica 'El País', poidan "ser utilizadas como probas de cargo cara aos imputados", entre os que tamén figura Fernando Blanco, exconselleiro co bipartito, que tamén dimitiu a raíz das acusacións do propietario de Laboratorios Nupel.

Finalmente, Ulises Bértolo sinalou que, agora con máis razón, é preciso que se levante o segredo de sumario da 'Operación Campéon', malia que a titular do xulgado número tres de Lugo acaba de asinar unha nova prórroga das cautelas xudiciais por un mes máis, ata o 7 de marzo.